Waziri Makamba asifu kazi inayofanywa na Africab

Waziri wa nishati, January Makamba akizungumza na wafanyakazi wa kiwanda cha Africab, Makamba alikuwa kwenye ziara ya kikazi kukagua kiwanda cha Africab ili kuangalia hali ya Utendaji kazi katika uzalishaji wa vifaa vya umeme hapa nchini.

Waziri wa Nishati January Makamba  akiwa katika ukaguzi.

Mwandishi wetu

Waziri wa Nishati January Makamba amesifu kazi inayofanywa na kiwanda cha Africab kinachojishughulisha na uzailishaji wa vifaa vya umeme kilichopo kurasini, jijini Dar es salaam

Aidha, ameelezea kuridhika kwake na ubora wa bidhaa zinazotengenezwa na kiwandani hapo huku akiwasihi kuendelea kuzingatia ubora huo ili bidhaa zao ziweze kukidhi mahitaji kwenye soko.

Makamba amezungumza hayo jana Jijini Dar es Salaam alipofanya Ziara ya Ukaguzi katika kiwanda cha Africab ili kuangalia hali ya Utendaji kazi katika uzalishaji wa vifaa vya umeme hapa nchini.

Pia ametoa ushauri kwa viwanda vya ndani kuzingatia ubora katika bidhaa.

Amesema hali ya Ufanisi wa viwanda vya ndani utaisaidia Serikali kuondokana na utegemezi wa bidhaa za nje ya nchi ikiwemo kuepuka gharama za uagizaji wa vifaa vya umeme nje ya nchi na kuharakisha utekelezaji wa miradi mbalimbali ya umeme nchini.

Kwa upande wake David Tarimo ambae ni Mwakilishi kutoka Africab, akizungumza mbele ya Waziri wa Nishati January Makamba ameihakikishia Serikali kuendelea kuzalisha Vifaa vya umeme kwa viwango vya kimataifa

Aidha, Tarimo aliiomba Serikali kutoa ushirikiano kwa viwanda vya ndani kwani vina uwezo mzuri wa kuzalisha bidhaa zinazokidhi vigezo.

“Tumefarijika kutembelewa na viongozi wa serikali, sisi Africab tunao uwezo mkubwa wa kuzalisha vifaa vyote vya umeme vikiwemo transfoma, na nyaya za umeme, kwa sasa tunajenga kiwanda kikubwa kule Kimbiji ambacho tunaimani kitasaidia kukidhi mahitaji ya nyaya za umeme hapa nchini,” alisema Tarimo

Mbali na kuongeza uzalishaji, pia Tarimo amesema Kampuni yao inajivunia kuongeza ajira kwa watanzania na kutoa ombi kwa serikali kuendelea kuwaunga mkono.

Katika hatua nyingine, Tarimo ameipongeza serikali kwa kitendo chake cha kutoa maamuzi ya kutumia bidhaa zinazozalishwa nchini.

“Watanzania tunao uwezo wa kufanya vitu vyetu wenyewe bila kutegemea bidhaa kutoka nje ya nchi,” alisema

Aidha akizungumzia uwezo wa kiwanda kuzalisha, Tarimo amesema kiwanda kinauwezo mkubwa wa kuzalisha vifaa vya umeme

“Tunaiomba serikali iendelee kutuunga mkono, Kiwanda cha Kimbiji kitatoa bidhaa nyingi za umeme, vifaa kama nyaya za umeme, swichi, transfoma na vifaa vingine vyote vitazalishwa hapo,” aliongeza