WAZIRI MAMBO YA NDANI ASIFU JITIHADA ZA CHUO CHA USAFIRISHAJI



Naibu waziri wa mambo ya ndani Hamad masauni  akijaribu kifaa kinachotumika kuongoza ndege (flight simulator) katika ziara yake ya kutembelea chuo cha Taifa cha Usafirishaji NIT kilichopo Mabibo Jijini Dar es Salaam.

Naibu Waziri wa mambo ya ndani Mh. Hamad masauni amesifu jitihada zinazofanywa na safu ya Uingozi wa Chuo cha Taifa cha usafirishaji (N.I.T) chini ya Profesa Zacharia Mabubu Mganilwa, za kufua wataalamu wa nyanja mbalimbali katika sekta ya usafirishaji ikiwamo usafiri wa anga.
 Masauni ameyasema hayo wakati alipotembelea chuo cha taifa cha usafirishaji(NIT) na kujionea vitu mbalimbali ikiwepo kifaa kinachotumika kuongoza ndege (flight simulator) pamoja na kituo kinachotumika kufanya ukaguzi wa magari (vehicle inspection) ambacho tayari kimeanza kufanya kazi kikishirikiana na Shirika la Viwango Tanzania (TBS).
Aidha kwa upande Mkuu wa chuo cha Taifa cha Usafirishaji, Prof. Zacharia Mganilwa akielezea ufanisi wa kituo cha ukaguzi wa magari (vehicle inspection) amesema kituo hicho kinauwezo mkubwa wa kukagua magari.
"Tunashirikiana na wenzetu TBS katika kazi hii ya ukaguzi wa magari, wenzetu wanayaelekeza magari yote yanayonunuliwa kuja hapa kukaguliwa kabla hayajaanza kutumika katika barabara zetu...na kwa siku kituo chetu kina uwezo wa kukagua magali zaidi ya 600...lakini si hivyo tu pia vijana wengi wamepata ajira hususani wahandisi wa magari" . Alisema Prof Mganilwa
Naibu Waziri Masauni alikuwa katika ziara yake ya kawaida jana ambako aliweza kujionea maendeleo ya chuo cha taifa cha usafirishaji.

WAPIGA DEBE 150 WAKAMATWA DAR,SOMA HAPO KUJUA

Jeshi la Polisi Kanda Maalumu ya Dar es Salaam, limetangaza kukamata watu wapatao 150 kuanzia Agosti 14 hadi 17 mwaka huu, kwa makosa ya kuwabughuzi abiria katika maeneo mbalimbali ya jiji katika vituo vya mabasi.

Wakati akizungumza na wanahabari jana  jijini Dar es Salaam, Kaimu Kamanda wa Polisi Kanda Maalumu ya Dar es Salaam, Kamanda Lucas Mkondya, alisema watuhumiwa hao walikamatwa kufuatia misako na operesheni kali iliyofanywa na polisi, na kwamba watafikishwa mahakamani kujibu mashtaka yanayowakabili.

“Stendi ya mabasi ya Ubungo walikamatwa 39, Posta 12, Ferry 7, Tegeta 12, Tandika 16, Mnazimmoja 6, Stesheni 5, Manzese 12, Bunju 8 na Stereo 7,” amesema.

Katika hatua nyingine, Kamanda Mkondya alisema Jeshi la Polisi katika nyakati tofauti ilikamata watuhumiwa 167 kwa makossa mbalimbali ya kihalifu ikiwemo kujihusisha na biashara ya dawa za kulevya, unyang’anyi wa kutumia sialaha na utapeli, kucheza kamali na kuuza pombe haramu ya gongo.

“Katika operesheni hii kali ambayo ni endelevu, jumla ya kete 96 za dawa ya kulevya, misokoto ya bangi 107, gongo lita 60 zilikamatwa. Tunaomba raia wema kuendelea kutoa taarifa za wahalifu ili tuwakamate na hatua kali za kisheria zifuatwe dhidi yao,” alisema.

 Alisema watuhumiwa wote wanaendelea kuhojiwa kulingana na makossa yao na kwamba upelelezi ukikamilika watafikishwa mahakamani kwa hatua za kisheria zaidi.

MAALIM SEIF AMJIBU TENA MSAJILI WA VYAMA VYA SIASA,SOMA HAPO KUJUA

Katibu Mkuu wa CUF Mhe. Maalim Seif Sharif Hamad amemjibu Msajili wa Vyama vya Siasa nchini Mhe. Jaji Francis S.K.Mutungi kuhusu sakata la kufukuzwa uanachama wanachama saba wa CUF na kuhusu kutomtambua yeye kama Katibu wa CUF.

Maalim Seif amedai kuwa wao kama CUF hawakubaliani na maamuzi ya Jaji Mutungi kumtambua Profesa Lipumba kama Mwenyekiti wa CUF kwa kuwa wao tayari walishamfukuza uanachama hivyo si mwanachama wa CUF na wala hana sifa ya kuwa kiongozi katika chama hicho.

"Mheshimiwa Msajili unafahamu fika kuwa Profesa Ibrahim H. Lipumba mwenyewe aliamua kujiuzuilu uenyekiti wa taifa wa Chama cha CUF. Pamoja na kuniandikia mimi nikiwa Katibu Mkuu na pia Katibu wa Mamlaka iliyomchagua (Mkutano Mkuu wa Taifa) kunijulisha kuwa amejiuzulu, pia alikwenda kwenye mkutano na waandishi wa habari akatangaza hadharani kuwa amejiuzulu

"Hatimaye Mkutano Mkuu wa Taifa wa CUF ukaitishwa na Katibu Mkuu akatoa taarifa ya kupokea barua ya kujiuzulu kwa Profesa Ibrahim Lipumba nafasi yake ya Uenyekiti wa Taifa wa Chama. Nikaisoma barua yake mbele ya Mkutano Mkuu wa Taifa, na baada ya mjadala wa kina maamuzi yakachukuliwa kwa mujibu wa matakwa ya Katiba ya CUF ya 1992 (Toleo la 2014) kwa kupiga kura. Wajumbe 437 wakakubali kujizulu kwa Profesa Lipumba dhidi ya Wajumbe 14 waliokataa. Hivyo Profesa Ibrahim H. Lipumba kuanzia siku aliyojiuzulu si Mwenyekiti wa Taifa wa CUF. Profesa Lipumba hana mamlaka ya kukiongoza Chama chetu" alisisitiza

Aidha Maalim Seif anasema kutokana na maamuzi hayo ya CUF baadaye Profesa Lipumba alikuwa akilalamika kwa Msajili wa Vyama Vya Siasa kufuatia maamuzi hayo na baadaye Msajili alitoa msimamo wake kuwa anamtambua Lipumba kama Mwenyekiti wa Taifa wa CUF ingawa Katibu Mkuu wa CUF anasema msajili hana uwezo huo wa kumrudisha Lipumba kama Mwenyekiti wa CUF

"Najua kuwa alikulalamikia, ukaniletea barua zake za malalamiko na ukataka maoni ya Chama. Nikakujibu kwa maandishi. Kwenda na kurudi ukatoa kile ulichokiita Msimamo wa Msajili juu ya kadhia iliyokikumba Chama! Huo ni Msimamo sio hukumu. Maana kama ni hukumu ningetarajia katika huo ulioita msimamo ungeeleza kuwa kwa uwezo uliopewa na kifungu Na. kadhaa cha Sheria ya Vyama vya Siasa Na.5 ya 1992, au kwa mujibu wa uwezo uliopewa na Katiba ya CUF ya 1992 (Toleo la 2014) katika kifungu Na. kadhaa umeamua kumrudisha Profesa Ibrahim Lipumba kuwa Mwenyekiti wa Taifa wa CUF. Lakini hukuweza kuonyesha uwezo wako wa kisheria au kikatiba kumrudisha Profesa Lipumba kuwa Mwenyekiti wa Taifa CUF kwa sababu huna uwezo huo kwa mujibu wa sheria za nchi wala kwa mujibu wa Katiba ya CUF" alisema Maalim Seif

Katibu Mkuu wa CUF amesema wao wanazidi kumshangaa msajili wa vyama vya siasa nchini Jaji Mutungi kuendelea kushirikiana na Profesa Lipumba hata katika mambo ambayo yanatia aibu kama kutaka kutoa ruzuku za chama na kumpa Lipumba na genge lake.

"Tunaloshuhudia ni kila kukicha unaendelea kumuunga mkono Profesa Lipumba hata katika mambo ya aibu ya kula njama na Profesa Lipumba kumuwezesha atoe ruzuku ya CUF kinyume na matakwa na taratibu zilizowekwa katika Katiba ya CUF ya 1992 (Toleo la 2014). Narudia kusema kuwa Prof. Lipumba si Mwenyekiti wa Taifa wa CUF. Lakini kutokana na vitendo vyake vya kukosa nidhamu katika kusababisha vurugu katika kikao cha dharura cha Mkutano Mkuu wa Taifa wa chama chetu, Baraza Kuu la Uongozi la Taifa, kwa uwezo lillonao kwa mujibu wa masharti ya Katiba ya CUF, lilimfukuza Profesa Ibrahim Lipumba uanachama wa CUF. Taarifa hiyo pia nilikuletea, lakini umeamua kuitia kapuni ili kutimiza matakwa yako binafsi. Ikiwa Profesa Ibrahim H. Lipumba sio mwanachama wa CUF, hawezi kabisa kuwa kiongozi wa Chama, hasa nafasi ya juu kabisa katika Chama. Kinachotokea kikiongozwa nawe na Ofisi yako ni ubabe, kutojali sheria za nchi wala Katiba ya Chama chetu ilimradi mufikie lengo lenu" alisema Maalim

Mbali na hilo Maalim Seif aliweka msimamo wake kuwa Chama Cha Wananchi CUF hakiendeshwi na hisia za mtu wala hakiwezi kupangiwa kiongozi na kudai ni CUF ni taasisi inayoongozwa na sheria za nchi na Katiba na si vinginevyo.

"Mheshimiwa Msajili napenda utambue kuwa CUF ni taasisi, tena Taasisi makini. Kinaendeshwa na kuongozwa kwa mujibu wa sheria za nchi na Katiba ya Chama hicho pamoja na Kanuni ambazo hutungwa na mamlaka husika kila inapohitajika. Sisi viongozi wa CUF tunajitahidi kuongozwa na sheria za nchi, Katiba ya Chama na Kanuni zake katika kukiendesha chama. Hatuongozwi na matakwa ya mtu yeyote, hata kama mtu huyo ni Msajili wa Vyama vya Siasa. Ninavyofahamu Msajili hana mamlaka ya kupandikiza watu anaowataka kuwa viongozi wa chama chetu. Msajili hana uwezo wa kuingilia maamuzi halali ya vikao halali vya Chama chetu. Viongozi huchaguliwa /kuteuliwa na wanachama wenyewe/viongozi halali wa chama" alisisitiza Maalim Seif

MAKAMU WA RAIS AMUWAKILISHA MAGUFULI SADC,SOMA HAPO KUJUA


SeeBait
Makamu wa Rais wa Jamhuri ya Muungano wa Tanzania Mhe. Samia Suluhu Hassana , jana tarehe 18 Agosti 2017 amehudhuria Mkutano wa Troika Mbili za Asasi ya Siasa, Ulinzi na Usalama ya Jumuiya ya Maendeleo Kusini mwa Afrika SADC na Troika ya SADC kwa ajili ya kujadili hali ya Siasa , Ulinzi na Usalama katika Kanda.

Mkutano huu umejadili zaidi hali ya Siasa nchini Lesotho na namna ya kuisaidia Jamhuri ya Kidemokrasia ya Congo ambayo inatarajiwa kufanya Uchaguzi Mkuu.

Taarifa kamili ya Mkutano huu itawasilishwa kesho Jumamosi tarehe 19 Agosti 2017, katika Mkutano wa 37 wa Wakuu wa Nchi na Serikali wa Jumuiya ya Maendeleo ya Kusini mwa Afrika SADC.

Double Troika inahusisha nchi wanachama Sita ambao kwa sasa ni Swaziland, Tanzania, Afrika Kusini, Angola, Botswana na Msumbiji.

Imetolewa na

Ofisi ya Makamu wa Rais
Pretoria, Afrika Kusini
18 Agosti, 2017.

KAMPUNI YA TIGO KUWAPA WATEJA WAKE SIMU YA KISASA YA TECNO,SOMMA HAPO KUJUA


Meneja Mawasiliano wa Tigo, Woinde Shisael akizungumza na waandishi wa habari wakati wa  uzinduzi wa promosheni ya 'nunua na ushinde' ambayo inawapa wateja nafasi ya kujishindia pikipiki na TV za kisasa kwa kununua simu mpya aina ya Tecno S1 na Tecno R6 kutoka kwenye maduka ya Tigo nchi nzima. Kushoto ni Meneja mawasiliano wa Tecno, Eric Mkomoya.

Meneja Mawasiliano wa Tigo, Woinde Shisael akfafanua jambo kwa waandishi wa habari wakati wa uzinduzi wa promosheni ya 'nunua na ushinde' ambayo inawapa wateja nafasi ya kujishindia pikipiki na TV za kisasa kwa kununua simu mpya aina ya Tecno S1 na Tecno R6 kutoka kwenye maduka ya Tigo nchi nzima. Kushoto ni Meneja mawasiliano wa Tecno, Eric Mkomoya.

Meneja Mawasiliano wa Tigo, Woinde Shisael akiwa amepanda pikipiki mbele ya waandishi wa habri mara baada ya kuzindua promosheni mpya ya 'nunua na ushinde' ambayo inawapa wateja nafasi ya kujishindia pikipiki na TV za kisasa kwa kununua simu mpya aina ya Tecno S1 na Tecno R6 kutoka kwenye maduka ya Tigo nchi nzima. Pembeni ni Meneja  mawasiliano wa Tecno, Eric Mkomoya.

Wateja kushinda zawadi murua ikiwemo pikipiki na TV za kisasa kwa kununua simu za Tecno S1 na Tecno R6 kutoka maduka ya Tigo nchi nzima.

 
Dar es Salaam,  Agosti 17, 2017- Kampuni inayoongoza kwa maisha ya kidigitali, Tigo Tanzania imezidi kuwaneemesha wateja wake baada ya kuzindua promosheni kabambe ambayo inawapa wateja nafasi ya kushinda pikipiki na TV za kisasa kwa manunuzi ya simu mpya aina ya Tecno S1 na Tecno R6 kutoka kwa maduka ya Tigo nchi nzima.
 
Akizungumza katika uzinduzi wa promosheni hiyo murua iliyofanyika katika makao makuu ya Tigo jijini Dar es Salaam, Meneja Mawasiliano wa Tigo, Woinde Shisael alisema kuwa kupitia promosheni hii Tigo inahakikisha kuwa kila mtu sasa ana nafasi ya kumiliki simu bora ya kisasa kwa bei nafuu. Ikiwa ni muendelezo wa juhudi za Tigo kukuza mabadiliko ya dijitali nchini..
 
Pamoja na hayo, kwa manunuzi ya simu aina ya Tecno S1 na Tecno R6 kutoka maduka yote ya Tigo nchini, wateja wataingizwa kwenye droo itayowapa nafasi ya kushinda mojawapo ya pikipiki 20 na televisheni 20 za kisasa zinazoshindaniwa katika promosheni hii.
 
Shisael aliongeza kuwa kila mteja atakaponunua simu aina ya Tecno S1 na Tecno R6 kutoka maduka ya Tigo, wafanyakazi wa Tigo watanakili namba maalum ya utambulisho ya simu (IMEI) pamoja na jina na namba ya simu ya mteja husika aliyenunua simu. Namba hizi zitaingizwa katika droo za kila wiki ambapo kila wiki, wateja watapata nafasi ya kujishindia mojawapo ya pikipiki mbili na TV mbili zitakazoshindaniwa katika droo za wiki.
 
‘Promosheni hii ya Tecno S1 na Tecno R6 inahusu tu wale wateja watakaonunua simu za aina hii kutoka kwa maduka yetu ya Tigo nchini kote. Simu ya Tecno S1 ni ya mfumo wa 3G na itapatikana kwa bei ya shilingi 99,000/- tu. Simu ya Tecno R6 ni ya mfumo wa 4G na itapatikana kwa bei ya shilingi 195,000/- tu. Simu zote mbili ni za kisasa na zina uwezo wa kutumia mfumo wa data, kwa hiyo wateja wataweza kutumia huduma bora za data za 3G na 4G kutoka Tigo, hii ikiwa inalingana na aina ya simu watakayonunua’ alifafanua.
 
‘Tigo inawaelewa na kuwathamini wateja wake kwa ushirikiano mkubwa wanaotupatia. Daima tupo mstari wa mbele kuwarudishia shukrani kwa wateja wetu kwa imani kubwa wanayotuonesha siku hadi siku. Kwa hiyo leo tuna furaha kubwa tena kuwapa wateja wetu nafasi ya kumiliki simu hizi mbili za kisasa zinazopatikana katika maduka yote ya Tigo nchini kote. Pia tunawapa nafasi ya kujishindia zawadi hizi kemkem za pikipiki na TV za kisasa zitakazoboresha maisha yao. Tunaamini kuwa hii itawawezesha wateja wetu kuendelea kufurahia huduma zetu bora zinazobadilisha maisha yao ya kidigitali siku hadi siku,’ Shisaeli alimaliza.

FREEMAN MBOWE AMCHONGEA RAIS MAGUFULI KWA WANANCHI,SOMA HAPO KUJUA

FREEMAN Mbowe, Mwenyekiti wa Chama cha Demokrasia na Maendeleo (Chadema) amewataka watanzania kutokuogopa kumkosoa Rais John Magufuli pale anapokosea, anaandika Hellen Sisya.
Mbowe ameyasema hayo mapema leo hii katika hoteli ya Protea iliyopo Upanga jijini Dar es Salaam na kusisitiza kuwa endapo taifa litakuwa na watu waoga, basi kuna uwezekano wa taifa hilo kutawaliwa na dikteta.
“Anapostahili pongezi tumpe pongezi, anapostahili lawama tumpe lawama bila kuogopa. Tukiwa taifa la watu waoga Mwalimu Nyerere alituasa tutatawaliwa na dikteta “ amesema Mbowe.
Aidha, Mbowe amesisitiza kuwa watanzania wanapaswa kutambua kuwa kauli za Rais Magufuli sio sheria za nchi.
“Rais apongezwe pale anapofanya jambo jema. Lakini afanye jambo jema kwa misingi ya katiba, sheria pamoja na mikataba ambayo tunaingia. Tusiwe wepesi kumshangilia Rais kwa kila analolizungumza tukidhani ni jambo jema,” amesisitiza Mbowe

SAKATA LA KUTAKA KUUZWA KWA MNADA BOMBARDIER YA MAGUFULI,TUNDU LISSU ATEMA CHECHE NZITO,,SOMA HAPO KUJUA

TUNDU Lissu, Mwanasheria Mkuu wa Chama cha Demokrasia na Maendeleo (Chadema) amelitaka Bunge kumshitaki Rais Magufuli kwa kusababisha hasara kubwa wakati akiwa waziri, anaandika Hamisi Mguta.
Lissu amesema kuwa Rais Magufuli amefanya mambo mengi bila kufuata sheria ambayo kwa sasa madhara yake ndio yanaanza kuonekana ikiwemo kukamatwa kwa ndege ya Tanzania aina ya Bombardier Q400 nchini Canada kwa kilichoelezwa kuwa ni kutokana na deni.
FUATILIA VIDEO HAPA CHINI TUNDU LISSU ALIVYOELEZWA NAMNA NDEGE HIYO ILIVYOKAMATWA NA SABABU ZA KUKAMATWA KWA NDEGE HIYO.
Share on Google+Tweet about this on TwitterShare on LinkedIn

Review Overview

MBUNGE KUBENEA AFANYA JAMBO HILI LEO JIMBONI KWAKE,SOMA HAPO KUJUA

SAED Kubenea, Mbunge wa Ubungo (Chadema), amefanya ziara ya ukaguzi wa ukarabati wa Shule za Msingi Mabibo na Makuburi zilizopo jimboni mwake, anaandika Faki Sosi.
Shule hizo zinakarabatiwa kwa fedha kutoka Halmashauri ya Ubungo na mfuko wa mbunge huyo ambazo zote zinakaribia kufikia Sh. 90 milioni.
Mfuko wa mbunge umetoa Sh. 17 milioni kwa ajili ya kukarabati shule ya msingi Makuburi.
Ukarabati huo ni wa majengo matano ya Shule ya Mabibo inayowekwa mabati mapya kutoka vigae ambavyo vimeharibika gharama yake ni Sh. milioni 17 kutoka mfuko wa jimbo wa Mbunge na ukarabati wa madarasa Shule ya Makuburi Sh. 40 milioni na Sh. 32 milioni zinazotumika kujenga vyoo.
Katika ziara hiyo, Kubenea aliambatana na Ofisa Mtendaji Kata ya Makuburi na Mwenyekiti wa Serikali ya Mtaa ya Mwongozo zilipo shule hizo mbili pamoja na wajumbe wa Kamati za Shule.

Kubenea ametembelea darasa la tatu la Shule ya Makuburi na kuwaahidi wanafunzi watano watakaofanya vizuri katika mtihani wao wa taifa wa darasa la nne mwakani atawazawadi Sh. 100,000 kila mmoja.
Wakati huo huo Kubenea amewasalimu walimu wa shule hizo pamoja na wanafunzi hao ambao amewasisitiza kusoma kwa bidii ili siku moja waje wawe wabunge, walimu, wanasheria na wahandisi.

SERIKALI YAFUKUZA KAZI WALIMU HAWA,SOMA HAPO KUJUA

Chamwino. Walimu 15 katika wilaya ya Chamwino mkoani Dodoma wamefukuzwa kazi baada ya kubainika kuwa ni watoro kazini.

Tume ya Utumishi na Ajira ya Walimu (TSC0 wilayani humo imefikia uamuzi huo baada ya kushughulikia mashtaka dhidi ya watumishi hao yaliyowasilishwa kwao.

Katibu wa TSC Wilaya ya Chamwino, Khalid Shaaban amesema uamuzi huo una gharama, lakini hakuna namna nyingine zaidi kufanya hivyo ili kuchochea uwepo wa nidhamu kwa walimu.

VILIO VYATAWALA UJIO WA WATOTO WA LUCK VISENT,SOMA HAPO KUJUA

Watoto Doreen, Sadia na WIlson wakiwa na wazazi wao.

Wazazi, watoto na watu mbali mbali wameshindwa kujizuia na kumwaga chozi walipokuwa wakiwapokea watoto Sadia Ismail, Doreen Eribariki na Wilson Tarimo, ambao wamerejea rasmi nchini wakitokea nchini Marekani walikokuwa wakipatiwa matibabu.

Watoto hao ambao ni manusura wa ajali iliyoua takriban wanafunzi 32 wa shule ya msingi Lucky Vicent, wamepokelewa na viongozi mbali mbali wa serikali wakiwemo Mkuu wa mkoa wa Kilimanjaro, Bi. Anna Mghwira, Mbunge wa Singida Kaskazini Lazaro Nyalandu, wazazi na wanafunzi wa shule ya Lucky Vicent, waliwasili katika uwanja wa ndege wa kimataifa wa Kilimanjaro (KIA).

Watu mbali mbali walihudhuria uwanjani hapo wakiwa na mashada ya maua kuwalaki huku kukiwa na burudani mbali mbali kutoka kwa sanii Mercy Masika wa Kenya, Angel Bernad wa Tanzania na Kwaya ya Shangwe kutoka jijini Arusha.

Shirika la Samaritan Purse la Marekani lilijitolea kusaidia watoto hao kuanzia usafiri na gharama za matibabu kwa muda wote ambao walikuwa nchini humo wakitibiwa, katika Hospitali ya Sioux City tangu mwezi Mei 15, kufuatia majeraha makubwa kwenye ajali kubwa waliyoipata tarehe 6 Mei 2017, wakitokea hospitali ya Mt. Meru Arusha.

CCM KWAANZA KUFUKUTA,MAKADA WAKE NUSURA WAZICHAPE ,SOMA HAPO KUJUA

Wanachama wa CCM, Kata ya Endiamtu, Simanjiro mkoani Manyara wakizozana mbele ya polisi baada ya kushindwa kufanya uchaguzi jana. Picha na Joseph Lyimo 

Mirerani. Uchaguzi wa viongozi wa CCM Kata ya Endiamtu mji mdogo wa Mirerani wilayani Simanjiro mkoani Manyara uliokuwa ufanyike jana, umeahirishwa baada ya kutokea vurugu za wanachama waliokuwa wakipinga majina ya wagombea wanaowaunga mkono kukatwa.

Vurugu hizo zilizotokana na madai ya wanachama hao kwamba majina ya wagombea makini yalikatwa na badala yake kupitishwa ambayo walidai kuwa ni watu dhaifu wasioweza kukivusha salama chama hicho kilichopoteza nafasi ya udiwani na ubunge kwa wapinzani wao Chadema.

Hali ya hewa ilianza kuchafuka baada ya wasimamizi wa uchaguzi huo, mjumbe wa kamati ya siasa ya CCM wilaya hiyo, Awadhi Omari na katibu wa UVCCM wa wilaya hiyo, Bakari Mwacha kusoma majina ya waliopitishwa kugombea nafasi mbalimbali.

Mwacha alitaja majina matatu yaliyopitishwa kugombea uenyekiti wa CCM wa kata hiyo kuwa ni Claudia Dengesi, Paul Kiula na Sifael Saitore na kuzusha sintofahamu baada ya kukosekana kwa jina la Elisha Mnyawi ambaye ni mfanyabiashara maarufu wa madini ya tanzanite.

Mwenyekiti wa Kitongoji cha Tupendane, Isaya Abayo alihoji sababu za jina la Dengesi kurudishwa ilihali alishachaguliwa kuwa mwenyekiti wa Umoja wa Wanawake (UWT) wa kata hiyo na kukata majina ya wagombea wengine wenye uwezo mkubwa wa kiutendaji.

“Mwenyekiti wa CCM, Rais John Magufuli alishatoa maagizo kuwa kwenye CCM mpya ni mtu mmoja nafasi moja, sasa inakuwaje huyu mama anapatiwa nafasi nyingine ya kugombea wakati ni mwenyekiti wa UWT?” alihoji.

Mwenyekiti wa Kitongoji cha Tanesco, Justin Abraham aliunga mkono kauli ya Abayo na kusema CCM ni chama cha wanachama wote na kila mmoja ana hisa moja hivyo kisigeuzwe kuwa kundi la familia.

“Mimi sina imani na hawa wasimamizi kwani ndiyo wanasababisha migogoro kwenye hizi kata za Mirerani na Endiamtu, badala ya kutufanya tuungane ili kuwaondoa Chadema kwenye kata na wilaya,” alisema Abraham.

Mwanachama mwingine Japhary Matimbwa alisema ni jambo la kushangaza kukatwa kwa majina ya watu makini wenye ushawishi mkubwa kwa jamii na viongozi, huku majina ya watu dhaifu na mengine ya familia moja yakipitishwa kwa upendeleo.

“Haiwezekani jina la Meya wa Mji mdogo wa Mirerani, Adam Kobelo na mtu makini kama Elisha Mnyawi na Oscar Gunewe yanakatwa, kisha yanapitishwa mengine ambayo hayana ushawishi kwa jamii, hawa hawawezi kukipitisha chama kwenye huu wakati mgumu,” alisema Matimbwa.

Akijitetea Mwacha aliwaambia wanachama hao kuwa wao walikuwa wasimamizi tu wa uchaguzi huo na suala la kupitishwa kwa majina, linahusu uongozi wa CCM ngazi za wilaya na mkoa.

Baada ya majibu hayo, baadhi ya wanachama walianza kuzozana wakinyan’ganyana simu kwa madai ya wengine kurekodi sauti na picha hali iliyosababisha waanze kurushiana viti.

Kutokana na vurugu hizo zilizodumu kwa zaidi ya dakika 10, Mwacha alimtumia ujumbe mfupi wa maandishi (sms), Mkuu wa Polisi Kituo cha Mirerani, ASP Evarest Makala ambaye alifika na kuamuru uchaguzi huo usitishwe mara moja.

Kutokana na hali hiyo, Katibu wa CCM Wilaya ya Simanjiro, Ally Kidunda alisema uchaguzi huo utarudiwa baada ya kupata maelekezo kutoka ngazi ya mkoa.

Kidunda alisema kata za Mirerani na Endiamtu, ndizo zilizokuwa zimepangiwa kuanza uchaguzi huo na kufuatiwa na nyingine. Wilaya hiyo ina kata 18

PROFESA LIPUMBA AKWAMA MAHAKAMANI,,,SOMA HAPO KUJUA

Mwenyekiti wa CUF anayetambuliwa na ofisi ya Msajili wa Vyama vya siasa, Profesa Ibrahim Lipumba na kundi lake wamekwama mahakamani leo baada ya Jaji Ndyansobera kukataa maombi ya Profesa Lipumba na kundi lake.

Jaji Ndyansobera amekataa kufuta kesi Namba 28/2017 kama ilivyoombwa na Lipumba ili wapate Ruzuku ya Chama  Cha Wananchi wa CUF inayofikia shilingi billion moja na million mia nne toka Julai mwaka jana.

Naibu Mkurugenzi wa Habari na Uenezi wa CUF, Mbarala Maharagande amefunguka na kusema kufuatia maamuzi haya ya mahakama hivyo hakuna pesa ambayo Profesa Lipumba anaweza kuchukua hata shilingi moja

RAIS MAGUFULI AFANYA UTEUZI HUU LEO,SOMA HAPO KUJUA

 Rais John Pombe Magufuli

Rais wa Jamhuri ya Muungano wa Tanzania Dkt. Jonh Pombe Magufuli, amefanya uteuzi wa viongozi mbali mbali akiwemo Mkuu wa chuo kikuu cha Ardhi.

Taarifa rasmi iliyotolewa na Ikulu jijini Dar es salaam inasema Rais Magufuli amemteua Prof. Evaristo Liwa kuwa Makamu Mkuu wa Chuo Kikuu cha Ardhi, kuchukua nafasi ya Prof. Idrissa B. Mshoro ambaye amestaafu.

Wakati huo huo Rais Magufuli amewateua Prof. Abdulkarim Khamis Mruma kuwa Mwenyekiti wa kampuni ya kuhifadhi mafuta (TIPER), ambaye kabla alikuwa ni Mtendaji Mkuu wa wakala wa Jiologia Tanzania, na Prof. Joseph Buchweshaija kuwa Mwenyekiti wa Kampuni ya Puma Energy Tanzania LTD.

Prof. Buchweshaija alikuwa Naibu Mkuu wa Chuo Kikuu Kishiriki cha Elimu Dar es salaam (DUCE).

MANJI AKWAMA TENA MAHAKAMANI,SOMA HAPO KUJUA

KESI ya uhujumu uchumi inayomkabili aliyekuwa Mwenyekiti wa Klabu ya Yanga, Yusuf Manji, imeahirishwa katika Mahakama ya Hakimu Mkazi Kisutu kutokana na mtuhumiwa huyo kutofika mahakamani hapo.

Akiieleza mahakama hiyo, wakili wa serikali Estazia Wilson ameiambia Mahakama mbele ya Hakimu Mkazi, Godfrey Mwambapa kuwa Manji hajafika Mahakamani hapo kwa vile ni mgonjwa ambapo kesi hiyo imeahirishwa hadi Agosti 25 mwaka huu itakapotajwa tena.

Manji na watuhumiwa wenzake watatu wanakabiliwa na mashtaka saba yakiwemo ya uhujumu uchumi, kukutwa na mihuri miwili ya JWTZ, ukiwemo wa Mkuu wa Kikosi cha 21 JWTZ, wa Mkuu wa Kikosi Makutupora Dodoma (JWTZ) na wa Commanding Officer Korogwe na plate number mbili za magari ya serikali.

Watuhumiwa wengine katika sakata hilo ni Deogratius Kasinda na Thobias Pwere na mwingine ambaye jina lake halikufahamika mara moja, wote wamerudishwa rumande.