Serikali yawaagiza Mameneja wa Posta kuwa wabunifu

 

 

Hussein Ndubikile, Dar es Salaam

 

Waziri wa mawasiliano Dkt Faustne Ndungulile ametoa maelekezo kwa Mameneja wote wa Mikoa  wa Shirika la Posta Nchini kuhakikisha wanakuwa wabunifu katika utendaji wao wa kazi ili kuzalisha fedha za kuendesha huduma pamoja kulipa mishahara.

 Maagizo hayo yametolewa jana jijini Dar es Salaam  katika Kikao Maalum cha Viongozi wa Posta cha Kutathimini mwaka uliopita na kupanga mikakati ijayo.

 

Amesema mameneja hao wanatakiwa kuwa wabunifu katika utendaji kazi wa kila siku lengo likiwa kutimiza malengo waliyowekewewa kusaidia uendeshaji wa shirika na ulipaji wa mtendaji mkuu wa Posta,

 

" Nendeni mkawe wabunifu matafute masoko ya bidhaa zenu timizeni malengo mliyojiwekea mkifaulu mtaweza kuendesha shirika na kulipa mshahara wa mkuu wenu mkishindwa  hamtoshi kuwa hapo," amesema Dkt. Ndungulile.

 

Amebainisha kuwa mameneja wanatakiwa kusimamia utoaji huduma kwa wateja bila urasimu hasahasa wanapofanya kazi na taasisi binafsi pamoja na kuwapa mafunzo watoa huduma wa shirika hilo ili kuendana na kasi ya mifumo ya uendeshaji ya kidijitali.

 

Amewasisitiza mameneja na watendaji wa shirika hilo kubuni vyanzo vipya mapato vitakavyosaidia kuendesha shirika pamoja na kujenga utamaduni wa kujadiliana na vyama vya wafanyakazi ili kuondoa migogoro ndani ya Posta.

 

Ameongeza kuwa ifikapo mwezi Septemba mwaka Posta na Shirika la Mawasiliano Tanzania (TTCL)  wawe wamefikia muafaka katika mgawanyo wa mali  na kutangaza katika gazeti la Serikali.

 

Kwa upande wake Kaimu Mkuu PostaMasta wa shirika hilo, Macrice Mbodo amesema kikao hicho siku tano kitahusisha utoaji wa mafunzo kwa viongozi, kupata uzoefu wa pamoja kutoka taasisi iliyofanikiwa, kufundishwa itifaki na ustaarabu wa viongozi kutoka Chuo cha Diplomasia, kujadili tathimini ya mwaka uliopita na changamoto, kupata mafunzo ya kupanga malengo kutoka ofisi ya utumishi pamoja na kupata nasaha za wakongwe wenye uzoefu wa kiposta na nje ya posta.

 

Naye Mkurugenzi Mkuu wa TTCL, Waziri Kindamba amewaomba mameneja kusimamia vyema mikoa yao  kutoa ushirkiano kwa Kaimu huyo ili kuhakikisha Posta inafikia malengo iliyojiwekea kufikia hatua ya utoaji huduma kimataifa kwa mifumo ya kidijitali.

 

Mwakilishi wa Mkurugenzi wa Mamlaka ya Mawasiliano Nchini (TCRA) Haroun Lemanya ameishauri menejimenti ya Posta kujifunza kwa njia ya mafunzo wafikie kutambulika viwango vya ubora wa kimataifa.

 

Mkurugenzi wa Mfuko wa Mawasiliano kwa Wote Jastina Mashimba amesema mameneja hao wampe ushirkiano Mbodo ili wafikie viwango vya utendaji kazi wa mashirika ya kimataifa ya huduma za posta likiwemo la DHL kutoka Ujerumani.

 

Mkurugenzi wa Idara ya Mawasiliano wa wizara hiyo Mhandisi Clarence Chikweleza amewahimiza watendaji wa shirika hilo kuendelea kufanya kiufanisi kufikia malengo waliyojiwekea na kuwasisitiza kutoa ushirikiano kwa Waziri Dkt. Ndungulile