Wiki ya magonjwa yasiyoambukiza yazinduliwa, Wataalamu wizara ya afya wataka wananchi kuwekeza kwenye afya

 

 

Imeelezwa kwamba magonjwa yasioambukizwa yameendelea kuitikisa Tanzania ambako imefikia hatua katika kila kundi la watu wanne mtu mmoja ana maradhi hayo huku vifo navyo vikiwa juu ambapo katika kila vifo 3 vinavyotokea mmoja wao anakufa kwa magonjwa hayohayo.

Akizungumza na mwandishi wa Tizii Media, Meneja mpango wa mpango wa taifa wa kuzuia na kuzibiti magonjwa yasiyoambukiza kutoka Wizara ya afya (NCD), Dkt Omari Mbuyu alisema hali imezidi kuwa mbaya na kuwataka watanzania kuwekeza katika afya zao ili kuzibiti maradhi hayo.

“Suala la afya ni jukumu letu, Wizara inakauli mbiu kuwa afya yangu mtaji wangu kwa hiyo lazima tuwekeze katika afya zetu, ukifanya mazoezi, ukiacha sigara, ukiacha pombe, ukizingatia mlo kamili maana yake unawekeza katika afya yako, kama taifa tujitahidi kuwekeza katika afya zetu,” alisema Dkt Omari.

Aliongeza kusema takwimu za hivi karibuni (2016) zinaonyesha kuwa kwenye kundi la watu wanne mmoja anashinikizo la damu, katika watu 10, mmoja anatatizo la kisukari, katika kila vifo vitatu basi mtu mmoja anakufa kwa ugonjwa usioambukizwa.

 

“Tupo hapa leo kuazimisha wiki ya magonjwa yasioambukiza, lengo kuu ni kujenga uelewa na hamasa juu ya magonjwa yasiyoambukiza kwa wananchi, kama taifa bado tuna hali mbaya, nguvu kubwa inahitajika ili kuiamsha jamii kupambana na maradhi haya,” aliongeza Dkt Omari.

 

Alitaja mfano wa magonjwa yasioambukizwa kuwa ni pamoja na shinikizo la damu, kisukari, saratani, magonjwa ya akili, baadhi ya magonjwa ya afya ya kinywa na meno, saratani za macho na mengine mengi ambayo yanaweza kuzuilika kama tutawekeza muda wetu na fikra zetu huko.

“Magonjwa karibu yote yanasabababishwa na vitu vinne, navyo ni ulaji wa hovyo, matumizi ya pombe kupita kiasi, matumizi ya sigara ya kiwango chochote kile pamoja na kutofanya mazoezi, kama tunahitaji kubaki salama lazima tuchunge afya yetu kwa kufanya mazoezi, kula kwa mpangilio, kuacha pombe na sigara.

 

“Kwa wastani mtu mzima anatakiwa kufanya mazoezi kwa dakika 30, sawa na dakika 150 kwa wiki, na ni mazoezi yoyote yale ambayo yataweza kukutoa jasho, au shughuli ya kijamii, wananchi fanyeni jitihada katika hilo,” aliongeza.

 

Naye, Mkuu wa Mkoa wa Dar es salaam Mhe. Aboubakar Kunenge amewasisitiza wananchi kuhakikisha wanafanya mazoezi na kuepuka ulaji usiofaa ili kujikinga na magonjwa yasiyo ambukizwa.

Aidha Kunenge amesema kwakuwa magonjwa yasiyo ambukizwa yanaweza kuzuilika ni vyema wananchi wakaanza kuchukuwa tahadhari mapema kwa kuhakikisha wanazingatia ulaji Bora, kupunguza ulevi usiofaa, kupunguza uvutaji wa sigara na kuzingatia michezo.

 

Pamoja na hayo RC Kunenge amesema Upande wa Serikali itaendelea kutoa elimu ya kutosha ya namna Bora ya kukabiliana na magonjwa hayo na kuendelea kuboresha na kuongeza miundombinu mbalimbali ya Afya 

 

Wizara ya Afya kwa kushirikiana na ofisi ya Mkuu wa Mkoa wamefanya Ufunguzi wa wiki ya kitaifa ya kukabiliana na Magonjwa yasiyoambukiza iliyoanza November 07 2020 na kufikia kikomo chake Novemba 14, 2020, katika wiki hiyo matukio mbalimbali yatafanyika ikiwamo michezo ya mpira wa miguu, kuendesha baiskeli, mpira wa mikono, mbio na michezo mingine mingi. Mbali na michezo pia wananchi watapata fursa ya kupima magonjwa mbalimbali bure na kupatiwa ushauri wa kitaalamu.