Kongamano la pili la magonjwa yasioambukiza lafanyika dar, watafiti Tanzania watakiwa kufanya tafiti za dawa asili

 

Mganga Mkuu wa Serikali Prof.Abel Makubi akiongea na wahiriki(hawapo pichani) kwenye kongamano la pili la kitaifa la sayansi la magonjwa yasiyoambukiza linalofanyika kwenye ukumbi wa JNICC jijini Dar es Salaam.

Washiriki wa Kongamano la pili la kitaifa la kisayansi la magonjwa yasiyoambukiza wakimsikiliza mgeni rasmi wakati wa ufunguzi

Mkurugenzi wa idara ya tiba kutoka Wizara ya Afya Dkt. Grace Maghembe na Mganga Mkuu wa Mkoa wa Dar es Salaam wakifuatilia ufunguzi wa kongamano hilo ambalo litakua la siku mbili

Na Mwandishi wetu

Kufuatia ongezeko la matumizi ya dawa asili hapa Tanzania hasa wakati ule wa janga la Corona (covid-19), serikali imetoa wito kwa watafiti kufanya tafiti ili kutoa majawabu sahihi juu ya uwezo wa wa dawa hizo juu ya kukabiliana na magonjwa yasioambukiza.

Hali ilivyo katika jamii, wananchi wengi wanatumia dawa asili zikiwemo za shinikizo la damu, kisukari, saratani lakini bado hakuna tafiti ambazo zimefanywa kuonyesha kuwa dawa hizo zinatibu kwa asilimia inayotakiwa.

Hayo yamebainishwa na  Mganga mkuu wa serikali, Prof Abel Makubi katika kongamano la  pili la kitaifa  la kisayansi la magonjwa yasiyoambukiza lililofanyika katika ukumbi wa JNICC, jijini Dar es Salaam.

“Tunahitaji tafiti zitakazosaidia kutatua changamoto mbalimbali za afya, wakati wa mlipuko wa Covid-19 wengi tulirudi kwenye dawa zetu za asili muda umefika sasa tupate majibu ya kisayansi yatakayotuonesha kwenye zile dawa kulikuwa na kemikali gani.

“Aidha tunatambua kuna dawa nyingi sana za asili zinatumika kutibu pumu, shinikizo la  juu la damu, saratani na mengineyo hivyo tunawakumbusha watafiti na taasisi zetu zote za utafiti kufanya tafiti za dawa hizi ili wananchi wetu wapatiwe taarifa sahihi za dawa hizi,”ameeleza Prof Makubi.

Amesema mchango wa tafiti mbalimbali ni muhimu iwapo utazingatia zaidi ubunifu, ugunduzi wa dawa na chanjo mbalimbali zitakazosaidia kupunguza magonjwa na vifo vinavyozuilika.

Magonjwa yasiyoambukiza (Non-Communicable Diseases) yanaendelea kuongezeka nchini ambapo jumla ya vifo 134,600 viliripotiwa mwaka 2017 sawa na asilimia 33 ya vifo vyote.

Prof Makubi aliongeza kuwa magonjwa yasiyoambukiza yamesababisha hasara kubwa kwa maana ya kuondoa nguvu kazi na kurudisha nyuma maendeleo ya mtu binafsi na taifa kwa ujumla na hivyo  kusababisha utegemezi sugu kwa familia na pia kuongeza  mzigo mkubwa kwenye mfumo wa afya kwa kuwa ni magonjwa yanayochukua muda mrefu na yanatumia raslimali nyingi.

Takwimu za Shirika la Afya Duniani (WHO) zinaonesha kuwa magonjwa yasiyoambukiza yanachangia zaidi ya vifo milioni 41 ambayo ni sawa na asilimia 71 vya vifo vyote milioni 57 vilivyotokea mwaka 2016.

Vifo vinavyotokea nchini vinatokana zaidi na magonjwa ya moyo na shikizo la Damu kwa asilimia 13, kisukari asilimia mbili, saratani asilimia saba na ajali asilimia 11 hali hii kwa ujumla haikubaliki na inatufanya tujumuike katika kujitathimini na kupanga mikakati ya pamoja.