KIKWETE AWAPIGA VIJEMBE WANAOISEMA VIBAYA CCM,SOMA HAPO KUJUA

DK. Jakaya Kikwete, Mwenyekiti wa Chama Cha Mapinduzi (CCM) amesema, watu wamesubiri sana chama hicho kimfie kikiwa mikononi mwake, imeshindikana, anaandika Dany Tibaso.

Ametoa kauli hiyo leo wakati akifungua mkutano wa Kamati Kuu ya CCM na kwamba, amefanya mambo mengi katika uongozi wake wa miaka 10.

“Wale wote ambao walidhani kuwa chama kitakufa, hakijafa na wala kuteteleka,” amesema Dk. Kikwete ambaye ni Rais Mstaafu wa Awamu ya Nne na kuongeza;

“Wapo watu ambao walidhani kuwa chama kitakufa na wakadhani watajitokeza, lakini chama hakijafa wala hata wao hawajatokeza.”

Dk. Kikwete amesema kuwa kikao cha leo ndio kikao chake cha mwisho kwa kuwa atakaa pembeni na kumkabidhi chama 

mwenyekiti mpya ambaye ni Dk. John Magufuli, Rais wa Tanzania.

Amesema, katika kipindi chake cha uongozi ndani ya chama kwa kushirikiana na Kamati Kuu, wameweza kufanya vyema na kukifanya chama kusonga mbele.

“Nimefanya kazi kwa ushirikiano mkubwa na Kamati Kuu na chama kimesonga mbele,” amesema Dk. Kikwete.

Mbwembwe nje ya ukumbi

Wakati Rais Magufuli akiingia katika viwanja vya CCM, alishuka kwenye gari huku akiwa na msafara mkubwa wenye ulinzi mkali.

Aliposhuka katika gari, alikwenda moja kwa moja kwa baadhi ya wanaCCM kwa kuwasalimia huku makada hao wakiwa wanaimba nyimbo mbalimbali za kumsifu mbalimbali ikiwa ni pamoja na ‘Daktari wa Majipu’, ‘Bavicha hawatuwezi’.

Maandalizi ya Ukumbi

Dk. Kikwete alitembelea ukumbi wa mikutano kwa maana ya kutaka kujiridhisha kama maandalizi yamekamilika.

Wakati akikagua ukumbi huo wa mikutano wa unaomilikiwa na CCM, aliwataka waandaaji kuhakikisha watu ambao watakuwa katika ukumbi huo, wapangwe katika maeneo ambayo hayatawasababishia usumbufu.

Mbali na hilo, aliwataka kuhakikisha wanaweka utaratibu ambao utawawezesha watu ambao watakuwa katika ukumbi huo kuwa katika hali ya utulivu huku akisema “mwenyekiti anatakiwa kuandaliwa sehemu nzuri ya kukaa ambayo itamwezesha kuona watu wote.”

Ole-Sendeka alonga

Christopher ole Sendeka, msemaji wa CCM amesema, mwenyekiti mpya atakayechaguliwa ndiye atakaye panga kuwepo kwa misafara au mikutano kwa ajili ya kuwashukuru wanachama.

“ Kwa sasa hatuna ratiba yoyote ya kufanya ziara katika mikoa kwa ajili ya kutoa shukrani, tunasubiri mwenyekiti mpya atakayepatinana ndiye atakayetoa ratiba kama kutakuwepo na kikutano ya kuwashukuru wanachama wa CCM au la” amesema ole Sendeka.

Habari hii kwahisani ya Mwanahalisi oline