Bi Fatma: Dereva Mlemavu anayetamani kumiliki benzi

 

Makala Maalum

Kuzaliwa mlemavu haimanishi kuwa wewe ni tegemezi, uwe ni wa kusaidiwa tu, ulemavu ni mapungufu ya kimaumbile mwanadamu anapaswa kuyakubali, gazeti imaani imefanikwa kukutana na mmoja wa watu wenye ulemavu wa miguu ambaye amekataa kuwa tegemezi, akapambana na maisha na sasa ni kama anaiona nuru, huyu haya Bi Fatma Amri Abdallah kutoka mkoani Lindi akieleza jinsi alivyofanikiwa kuyakubali mapungufu yake ya kimaumbile na kuamua kufanya kazi ya bajaji na kujiingizia kipato chake cha halali

 

Fullhabari: Tueleze kwa kifupi wewe ni nani na historia yako kwa kifupi

Bi. FATUMA Amri Abdallah: Mimi ni mama, nimezaliwa mwaka 1981, Mkoani Lindi, kama unavyoniona ni mlemavu wa miguu yote miwili, ili nipate riziki yangu ni lazima nitambae kutoka sehehmu moja kwenda nyingine, Nashukuru Mungu nimeolewa na mume wangu ananipenda ukweli wa kunipenda, mimi na Mume wangu tumefanikiwa kupata mtoto mmoja. Pamoja na kuwa katika ndoa na ulemavu wangu wa miguu, hali hii haijanfanya nibweteke. nimeamua kujishughulisha na utafutaji wa riziki ya halali. Katika familia yangu mimi ni mtoto pekee mwenye ulemavu, sikuzaliwa mlemavu, bali nlipata ulemavu nikiwa na umri wa miaka mitatu, baada ya kuugua na kupelekea ulemavu wangu, kabla ya hapo nilikuwa natembea kwa miguu yangu miwili kama wengine

 

Fullhabari: Tueleze kwa kifupi ni kitu gani kilichokusukuma kuingia katika biashara?

 Bi. Fatuma Abdallah: Nachukia kuwa tegemezi, mambo ya kuwa ombaomba sipend kabisa, najua maumbile yangu ni mtihani lakini siyo sababu ya kubweteka, nilikuwa naomba Mungu anisaidie nipate kuwa na uwezo wa kufanya kazi zangu mwenyewe katika njia inayompendeza. Nashukuru Mungu alinijibu, alinipitisha njia ambazo leo hii nimekuwa ni mtu wa kufanya kazi zangu mwenyewe. Kwa sasa mimi ni dereva wa usafiri maarufu  wa Pikipiki za miguu mitatu, maarufu kama Bajaji, nipo hapa mtaa wa Kongo na uhuru, Kariakoo jijini Dar es Salaam, nabeba abiria kutoka hapa kwenda feri na posta. Nimejitosa kufanya shughuli hii ya usafirishaji kwa dhamira ya kujikomboa kiuchumi, kama unavyoona mtaa huu ni mtaa wenye kila aina ya vurugu, msongamano wa watu na magari mengi. Namshkuru Mungu nafanya kazi hizi nikiwa nimevaa hijabu/ Nikaab na wateja wangu wanakubali hali hiyo. Fullhabari ilimshuhudia Fatma akiwa katika vazi tukufu la Niqaab, akifunika mwili wake wote, ukimkuta katika kazi yake utaona macho yake tu lakini vingine vyote vimestriwa na vazi la hijab. Yaani huwezi kujua kama ni mlemavu

 

 

Fullhabari: Pengine kabla ya kufanya kazi hii ya sasa uliwahi kufanya biashara? Kwa nini bajaji ya miguu mitatu

Fatma Abdallah: Ndoto ya kuwa mfanyabiashara imetoka mbali sana, nakumbuka nikiwa nasoma shule ya msingi, nilianza kufanya kazi za mikono, nilianza kupika vitumbua, chapatti na maandazi, baadae nlipata hamu ya kuondoka Mkoani Mtwara na kuja Jijini Dar es Salaam.

Lakini nilipomueleza mama yangu mzazi nia yangu hiyo, mama alinikatalia na hakunipa sababu ya kunikatalia. Ila nadhani mama yangu alikuwa anahofia kuwa mtoto wake nitajiingiza katika kazi ya kuomba.

Nilimhakikishia mama yangu kuwa sitojiingiza katika shughuli ya kuwa ombaomba.

Nilimjengea hoja mama yangu kuwa mimi nina ulemavu wa miguu lakini Mwenyezi Mungu ameniachia akili na mikono katika hali ya utimamu wake hivyo anaweza kujishughulisha na kazi mbalimbali na kuweza kujipatia kipato halali.

Mama alinielewa na hatimae niliingia Jijini Dar es Salaam, nikitokea Mtwara na kufikia kwa kaka yangu anaeishi Yombo Buza, na baada ya muda nilimuomba kaka yangu mtaji ili nianze kujishughulisha na biashara ndogo ndogo.

Bahati nzuri nlipata mtaji kutoka kwa kaka yangu, nilianza kuuza saa na mikoba ya wanawake, kituo changu cha kwanza kufanyia biashara hizo kilikuwa Karume Jijini Dar es Salaam.

Changamoto…

Siku moja nilienda kuswali Msikiti wa Lindi, Kariakoo Jijini Dar es Salaam, wakati huo nikiwa natumia Baiskeli za walemavu ambayo pia ilikuwa ikimsaidia kubeba bidhaa zake za biashara.

Nilipofika msikitini niliacha mzigo wangu nje katika baiskeli yangu na kuingia Msikitini, kwa ajili ya kufanya ibada lakini nilipotoka sikukuta mzigo. Yaani niliibiwa mikoba yangu yote ya biashara.

Sijakata tamaa, hali hiyo iliniongezea hamasa ya kutafuta zaidi, ilinibidi niende kwa jamaa mmoja wa Kihindi na kumuelezea changamoto yangu ambapo aliniliza kama nitaweza kazi ya kuendesha Pikipiki aina ya Bajaji.

Bila hofu na kwa kujiamini nikajibu naweza na kwamba nipo tayari kufanya kazi hiyo.

Hata suala la kuwa na leseni lilikuwa kama ni dalili ya kikwazo kwangu kupata neema ya ajira hiyo mpyao, ikanibidi kwenda kujiunga na Chuo cha Ufundi, Polisi Kilwa Barabara ya Kilwa na kusomea udereva na baada ya kuhitimu nilipata leseni ya kunihalalisha kufanya kazi ya udereva barabarani kwa mujibu wa sheria.

Baada ya kuhitimu kozi hiyo ya udereva na kurudi kwa Mhindi, Mhindi aliamua kuninunulia Pikipiki ya miguu mitatu aina ya Bajaji na kusaini mkataba kwa makubaliano maalum ya kibishara.

Atoa wito…

Naomba niwatake wanawake wasiogope kufanya kazi wakiwa katika stara, kwani kazi ni za muda mchache lakini Stara ndio kila kitu.

Kumbuka utaenda kujibu nini mbele ya Allah kwa kuacha stara kwa ajili ya kazi, ikibidi ifike mahala mwanamke uwe tayari kuacha kazi kwa ajili ya kuzuiwa kuwa katika stara, kwani rizki anatoa Allah.

Wakati naanza kazi ya udereva, nilitakiwa na Askari wa barabarani kuvua Nikabu kwa maelezo kuwa haifai kuendesha chombo cha moto nikiwa nimevaa vazi hilo. Hata hivyo niliwaeleza kuwa nipo tayari kuacha kazi, lakini sio kuvua vazi hijab. Mungu alikuwa name ninaendelea na biashara hii mpaka leo.

Pia nimepata changamoto kutoka kwa abiria, wengi walikuwa wakiikwepa Bajaji yake wakihofia uvaaji wake, wengine wakimfanyia kila aina ya kebehi.

Lakini nilibakia na msimamo wangu na walio panda aliwapa huduma yake vizuri na kupata riziki yake na kadri siku zilivyozidi kwenda, abiria walijenga imani naye na kwa sasa amekuwa na wateja wengi wakipanda chombo chake bila hofu kwa kuwa wameshamzoea.

Mafanikio yake…

Namshukuru Mungu kupitia kazi hii mpaka sasa naweza kumsomesha mwanangu na kumiliki kiwanja ambapo tamaa na malengo yangu ni kujenga nyumba ya kisasa.

Sio vibaya kama Waislamu wataniunga mkono kwa kunisadia vifaa vya ujenzi kama vile matofali, sementi na mbao. Bi. Fatuma, anapatikana kupitia namba za simu:-0719 319 348.