2020 ulikuwa ni mwaka wa vilio kwa waislamu?

 

Ikiwa tunakaribia kuufunga mwaka 2020 na kuukaribisha mwaka mpya wa 2021, imeelezwa kuwa jamii ya kiislamu ilipitia katika wakati mgumu kwa mwaka 2020 hasa baada ya shule zake maarufu kukubwa na kadhia ya kuungua moto mara kwa mara huku sababu za matukio hayo yakiwa hazijulikani.

 

Akitoa tathmini zake, Mkuu wa shule wa Ilala Islamic Buhero Issa alisema ulikuwa ni mwaka mgumu ambao hautaweza kusahaulika kwa jamii ya kiislamu kutokana na sababu kuu mbili, mosi ikiwa ni majanga ya moto lakini pili ni maradhi ya corona.

Majanga ya moto yaliathiri wazazi kiuchumi lakini pia kisaikolojia, kubwa la kushukuru ni kwamba wazazi hawakuyumba waliamini kuwa matatizo yaliyotokea ni kadari na wameendelea kuziamini shule za Kiislamu.

Licha ya kwamba majanga ya moto yalileta athari hasi kwa jamii lakini pia ilichangia kuleta mwamko kwa shule nyingi ikiwemo kuongeza umakini wa kujilinda dhidi ya majanga hayo

“Kila jambo lina athari chanya na hasi, faida tunayoiona katika majanga ya moto ni kwamba jamii imeongeza umakini, hivi sasa shule nyingi zimeongeza walinzi kutoka jeshi la kujenga taifa (JKT), Walezi wakiume na wakike, zingine zimewekewa camera za cctv,” alisema

“Nimesikitika kuona mpaka sasa tunakaribia kufunga mwaka bado hatujaona ripoti ya sababu za shule kuungua moto, kwetu ripoti zile ni muhimu sana kwa sababu zingetupa mwanga wa kitu gani cha kufanya ili kadhia kama zile zisiweze kujitokeza tena.

Eneo jingine ambalo amelitolea tathimini ni suala la maradhi ya corona, alisema lilikuwa ni janga la kidunia na limeta athari kubwa kiuchumi katika sekta ya elimu.

Buhero alisema wazazi wengi walilazimika kubadili mfumo wa ulipaji ada, watoto walikaa nyumbani muda mrefu sana, mashule mengi yalishindwa kulipa walimu/wafanya kadhi, kwa hiyo kwa vyovyote vile itaathiri mwaka 2021, maana madeni bado yapo.

Kutokana na watoto kukaa nyumbani muda mrefu walimu tulilazimika kutumia nguvu kubwa ili kukimbizana na sylabasi, tarehe za mitihani zilikuwa karibu. Mtoto anarudi shule anakuwa kama ndio anaanza upya.

 

Akitoa ripoti ya Jeshi la Polisi nchini kuhusu matukio mbalimbali yaliyojiri katika kipindi cha mwaka wa 2020, Kamishna wa Operesheni na Mafunzo wa Jeshi hilo CP Liberatus Sabas amesema, alitaja sababu za kuungua moto kwa shule nyingi hapa nchini.

CP Sabas alisema sababu kubwa zilizopelekea kwa shule nyingi kuungua moto ni pamoja na migogoro mashuleni, hitilafu za Umeme na uzembe.

 

Pia Kamanda Sabas alisema Matukio ya kuungua moto kwa majengo ya shule yalishika kasi kwa mwaka 2020 huku matukio mengine yakipungua.

 

Takwimu za jeshi la polisi zinaonyesha kuwa shule nyingi za watu binafsi au mashirika ya kidini ndio zimeongoza katika kuungua moto huku shule za serikali nazo zikiwepo.

 

“Toka Januari mpaka Novemba jumla ya shule 31 zimeungua moto huku shule za watu Binafsi/taasisi za Kidini zikiwa 20 na za Kiserikali zikiwa 11,” alisema Kamanda Sabas.

 

Akizungumzia matukio mengine, Kamanda Sabas alisema ajali za barabarani zimeendelea kupungua kwa asimia 33.9 ambapo kwa mwaka huu jumla ya watu 1158 walipoteza maisha na wengine 2089 wakiwa wamepoteza viungo vyao kati ya Januari hadi Novemba 2020,

Kuanzia Januari hadi Novemba 2020 matukio ya ajali yalikuwa ni 1800, ajali za vifo 935, waliokufa 1158 na majeruhi 2089, na kwamba kulingana na takwimu hizo mwaka huu ikilinganishwa na mwaka jana yamepungua matukio 922 ya ajali, sawa na 33.9%, ajali za vifo 182 sawa na 16.3%, waliokufa 171 sawa na 12.9% na waliojeruhiwa 628 sawa na 23.1%.

Upande wa unyang’anyi wa kutumia silaha (Ujambazi), Kamishna Sabas amesema, Jeshi la Polisi kwa mwaka huu limefanikiwa kupunguza makosa ya ujambazi wa kutumia silaha kwa kiasi kikubwa ikilinganishwa na miaka ya nyuma na mwaka jana.

Amesema,  kuanzia mwezi Januari hadi Novemba (2019) kulikuwa na makosa 378 huku mwaka huu kuanzia Januari hadi Novemba (2020) yamepatikana makosa 273 ya kutumia silaha hii ikiwa ni tofauti ya makosa 105 sawa na asilimia 27.

Kuhusu mauaji, Kamishna Sabas amesema, kwa kiasi kikubwa mauaji yanayotokea kwa sasa nchini yanatokana na wivu wa mapenzi na wananchi kujichukulia sheria mkononi.

Amesema, kutokana na hali hiyo Jeshi la Polisi limefanikiwa kutoa elimu kwa wananchi kutokujichukulia sheria mkononi huku likiwataka viongozi wa dini kuingilia kati katika kutoa elimu ili kusaidia kupunguza mauaji yatokanayo na wivu wa mapenzi kwani wengi ni waumini wa madhebu yao na wanawasikiliza sana.

Kamishna Sabas alisema  mwaka 2020 kulikuwa na wimbi kubwa la watoto kuacha shule na kwenda kujiunga na makundi ya kihalifu, miongoni mwa waalifu hao ni wale waliokuwa Kibiti na hatimae baada ya kupigwa na Jeshi la Polisi kwa kushilikiana na Vyombo vingine vya Ulinzi na Usalama walikimbilia nchi jirani ya Msumbiji.

Hadi sasa wapo wanafunzi waliokuwa wameacha shule na kujiunga na vikundi vya kihalifu ambao wamekamatwa wakiwa wanavuka kuelekea nchini Msumbiji na wengine tayari wameishafanikiwa kuvuka kuingia nchini humo.