WANANCHI WAMETAKIWA KUTOFUMBIA MACHO NA KUTOA TAARIFA ZA VITENDO VYA UKATILI VINAVYOFANYIKA KATIKA JAMII

Wanaharakati na wananchi kote nchini wametakiwa kuhakikisha wanachukua hatua za haraka sana endapo wanakutana na matukio ya ukatili ili kuweza kupunguza tatizo hilo na kuondokana na dhana ya kila jambo kuisubiri serikali ifanye.

Mkurugenzi Mtendaji wa TGNP. Lilian Liundi akitoa ufafanuzi wa jambo fulani mbele ya wanajamii kutoka kata mbalimbali za jiji la Dar es salaam.

Wito huo umetolewa na Mkurugenzi Mtendaji wa TGNP. Lilian Liundi katika semina za Jinisia na Maendeleo (GDSS) zinazofanywa na shirika hilo kila siku ya jumatano makao makuu ya shirika hilo Mabibo jijini Dar es salaam.

Aidha amesema kuwa tunapotoka katika maeneo yetu kuna ukatili mwingi na mkubwa, hivyo ni lazima tusema na tuchukue hatua ili kuweza kusaidiana kutokomea ukatili huu.

Ameongeza kwa kusema kuwa tunapoangalia masuala ya ukatili inabidi tuyaangalie kwa upana Zaidi kwani kuna makundi ambayo yanafanyiwa ukatili mkubwa sana na hayana fursa ya kujitetea kama watu wenye ulemavu.

“Lakini pia napenda kuwakaribisha watu mbalimbali wanajamii, wanafunzi wa kada zote kuweza kufanya kazi na Mtandao wa Jinisia Tanzania(TGNP), ili tuweze kusaidiana kuleta vuguvugu la ukombozi wa wanawake kijinsia” amesema Lilian Liundi

Kwa upande wake mshiriki wa semina hiyo Rebeca Rebby ambaye pia ni mzazi na mmiliki wa kituo cha Watoto wenye usonji, ameitaka jamii kutofurahia ukatili mbalimbali wanaofanyiwa Watoto wenye ulemavu hasa wenye usonji kwa kuwa ukatili huo unaathiri Maisha yao kwa kiasi kikubwa sana.

Ameendelea kusema kuwa wanaharakati nao wanatakiwa kupaza sauti ili kuweza kutokomeza vitendo hivyo na pia ametoa Ushuuda wa mtoto mwenye usonji ambaye amebakwa na kulawitiwa kwa Zaidi ya miaka tisa.

“Mimi kwenye kituo changu nini mtoto aliyefanyiwa ukatili wa kubakwa na kulawitiwa akiwa na miaka tisa na mpaka sasa ana umri wa miaka 16, na pale alipokuwa anaishi majirani walijua hilo lakini walishidwa hata kutoa taarifa mpaka mtoto ameharibika, Na polisi wameikataa kesi kwa kusema mtoto mwenye usonji hawezi kumbaini mtu aliyembaka hali iliyofanya watuhumiwa kuachuwa huru” amesema Rebeca

Mwenyekiti wa Kituo cha Taarifa na Maarifa Kipunguni Bi. Fatma Adulahmani akitoa wasilisho la namna wanavyofanya kazi katika kata yao.

Naye mwenyekiti wa kituo cha taarifa na maarifa Kipunguni Bi. Fatma Abdallahmani amesema kuwa wao kama kituo wamekuwa wakiwakomboa wasichana mbalimbali katika kata yao ili wasikeketwe na kuweza kuwapa mafunzo mbalimbali ya kujikwamua kiuchumi.

Ameongeza pia wamekuwa wakiwapa elimu mbalimbali wazee wa kimila ambao ndio wanafanya kazi ya kukeketa watoto pamoja na wazazi wanaotaka kukeketa Watoto wao, ili waachana na kazi hiyo na kuamua kuingia katika ujasiriamali wa kulima mboga na kufanya shughuli nyingine za halali za kujipatia kipato.