Mataruma Karani Wa Mahakama

 

 

ADELADIUS MAKWEGA-DODOMA.

 

Kikao cha bodi ya Shule ya Sekondari Lugoba kilikaliwa kwa nia ya kutambua hali ya maisha ya wanafunzi wa kike ikoje, kwa wakati huo Mbunge wa Jimbo la Chalinze alikuwa Ndugu Jakaya Kikwete. Kikao cha siku hiyo kilijumuisha wazazi kadhaa wenye watoto katika shule hiyo ya sekondarii.

 

Kwa hakika kikao kilikuwa cha wazi na ukweli huku wazazi na bodi ya shule wakikubaliana kwanza kuwatambua watu ambao walisababisha watoto wa kike kutokuwa na tabia nzuri shuleni na jambo hilo kusababisha wanafunzi wasichana wengi kuharibikiwa na kutomaliza shule iwe kwa tabia mbaya na kupata ujauzito.

 

Mwenyekiti wa bodi hiyo ya shule ambaye jina lake silikumbuki kwa sasa, alimua kuwa wazazi wawataje watu wote walionekana kuwa ni viranja wa kuwaharibu mabinti katika shule hiyo.

 

Majina kadhaa yalitajwa huku mkuu wa shule hiyo ambaye nayeye silikumbuki jina lake kwa sasa, ambaye alikuwa katibu wa bodi ya shule hii na katibu wa kikao hiki. Kikao hicho kilikuwa cha jazba na hasira kutoka kwa kila mzazi kwani takwimu zilizosomwa na mkuu wa shule juu ya mabinti waliopata ujauzito zilikuwa sawa na moto uliokuwa ukiwaka katika ukoka wa majani makavu.

 

Mkuu wa shule aliendelea kunakili kila jina lililotajwa. Yapo majina yaliyotajwa mara moja lakini yapo yaliyotajwa mara nyingi. Kwa desturi vijijini huwa hakuna siri hata kama kuna siri mambo yanapowafika shingoni wenye kijiji chao lazima wataibuka na kusema juu ya jambo hilo ambalo linawakera, ndivyo ilivyokuwa siku hiyo.

 

Katika kikao hiki mimi nilishiriki tu kama raia mwema lakini nilikuwa mwanahabari pekee ambaye nilishiriki kikao hicho kwa bahati mbaya tu bila ya kupata mwaliko huo. Lakini kwa kuwa nilikuwepo eneo hilo kama Afisa wa Serikali niliamua kusikiliza hadi mwisho.

 

Ni kweli kwa takwimu ilionekana kuwa hali ya shule hii itakuwa mbaya hivyo Mbunge wa jimbo hili alielezwa ambaye siku hiyo hakuwepo. Pia ilibainika kuwa Subash Patel alikubaliana na Mbunge kupeleka msaada wa magodoro kadhaa ili kuboresha mabweni ya shule hii ambayo yangesaidia wanafunzi kuweza kukaa bwenini na kuwaepusha majanga haya.

 

Katika utarabu wa kikao hicho ilishauriwa kuwa majina ya watu waliokuwa wanawarubuni watajwe kwa kusemwa kikaoni na wengine waandike majina haya katika karatasi.

 

Harakati zilianza wenye kunyoosha mkono walifanya hivyo na wale wa kuandika walifanya hivyo. Mwenyekiti wa Bodi ya shule hii alipokea vijikaratasi hivyo na kumpatia katibu wake baada ya kuyasoma majina yote yaliyoandikwa.

 

Basi majina yalitajwa bila woga na huku wengine wakitolea mifano ya tabia ya hao waliokuwa wakitajwa. Kikao hicho kilichukua karibu nusu ya muda wake katika zoezi la kutaja majina haya. Kubwa nililolibainia lilikuwa ni kutajwa mara nyingi kwa jina la Mataruma Karani wa Mahakama. Huyu bwana ndiye alikuwa kinara wa uhalibifu wa mabinti za watu kwa mujibu wa kikao hicho ambacho bwana huyu aliangushiwa zigo la tuhuma.

 

Jambo hilo kikaoni ilielezwa kuwa wazazi wengi walishalalamika muda mrefu kwa mkuu wa shule juu ya ndugu Mataruma na tabia yake mbaya. Kikao kilielezwa kuwa mwalimu wa nidhamu shuleni hapo anao ushahidi wa kutosha kwa wanafunzi waliopata ujauzito wa bwana huyu na kuacha masomo ambapo wanafunzi hao waliopata ujauzitio waliungama kwa mwalimu huyo kwa maandishi.

 

Kama hilo halitoshi kikaoni Mwalimu wa Nidhamu alieleza kuwa kuna siku akiwa nyumbani kwake alibishiwa hodi na mgeni. Alimkaribisha mgeni huyu na kumbe alikuwa ndiye Mataruma Karani wa Mahakama, ndugu huyu alipofika nyumbani kwa mwalimu wa nidhamu alilalamika kuwa mwalimu wa nidhamu anamfuatamfuata sana.

 

Mwalimu huyu alimwambia Ndugu Mataruma kuwa tabia anayoifanya ya uharibifu wa mabinti za watu ilikuwa kero kwa jamii wala siyo yeye anayelalamika bali watoto wenyewe walimtaja na pamoja wazazi wa watoto hao pia.

 

Matarumu alimwambia mwalimu huyu kuwa aache tabia ya kumfuatafuata. Kwa bahati nzuri mwalimu huyu wa nidhamu alikuwa ni mtu mzima mwenye watoto wa kike na wakiume wa kuzaa mwenyewe waliokuwa wanasoma shuleni hapo. Kwa mwalimu huyu ukiachia nafasi yake kama mwalimu lakini pia alikuwa mazazi.

 

Mwalimu huyu alisema kuwa japokuwa Ndugu Matarumu alifika nyumbani kwake kulalamikia juu ya yeye kutajwa nilimjibu kuwa tuhuma hizo zipo. Mwalimu huyu alienda mbali zaidi anasema kuwa baada ya Mataruma kutoka nyumbani kwake alihamishia nguvu za kuwasaka mabinti kwa familia ya mwalimu huyu.

 

Ushuhuda wa binti wa mwalimu huyu ulithibitisha kuwa karani huyu wa mahakama alijaribu kutumia fedha nyingi angalau atimize haja zake kwa binti wa mwalimu wa nidhamu ambapo suala hilo lilielezwa kikaoni na alieleza alikuwa mke wa mwalimu wa nidhamu ambaye nayeye alifika kama mzazi kikaoni hapo. Mataruma Karani wa Mahakama alionywa na kuchukuliwa hatua kali.

 

Kwa bahari nzuri pia Ndugu Subash Patel aliwezesha kupatikana kwa magodoro ya wanafunzi hao na kuweza kuishi bwenini na kuepukana na adha ya kuishi mitaani.

 

Hoja yangu ya leo ni moja tu angalia namna Mataruma Karani wa Mahakama anavyohangaika kulipiza kisasi kwa binti wa Mwalimu wa Nidhamu kwa tabia yake mbaya ambayo kwa hakika kwa hoja ya Mwalimu wa Nidhamu inaonesha kuwa tabia ya karani huyu ilikuwa mbaya.

 

Lakini pia angalia shule hii wazazi, mbunge na wadau walivyoshirikiana kuwawanusuru wanafunzi wa kike na matatizo ya kujiingiza katika tabia hizo mbaya. Kwa hakika jamii inaposhirikiana wanaweza kushinda changamoto zozote zile. Ebu kwa leo niishie hapo tu, nakutakia siku njema.

 

Makwadeladius@gmail.com

0717649257