Serikali yaombwa kuifuta sheria ya ugaidi, wadau wasema imejaa uonevu

 

Na. Heavenlight Bomani

 

Ofisi ya habari ya Hizb Ut Tanzania, imeitaka serikali kufutilia mbali sheria ya ugaidi kwani inapinga misingi mingi ya haki ikiwemo kumnyima mtuhumiwa dhamana, pamoja na fidia baada ya kumuweka mahabusu kwa miaka mingi.

 

Akizungumza na waandishi wa habari, katika ukumbi wa Hotel ya Travertine jijini Dar es salaam, Mwakilishi kwa vyombo vya habari Hizb Ut Tahrir Tanzania Masoud Msellem, amesema matumizi ya sheria hiyo yanaharibu mahusiano mema ya kijamii.

 

Ameongeza kuwa, sheria hiyo ni ya kibaguzi inayolenga kuwakamata na kuwatuhumu kundi fulani ndani ya jamii yaani waislamu.

 

"Kubwa zaidi sheria hii inatoa mwanya kwa watendaji waovu kudhulumu na kuleta uonevu na kutumika vibaya, hivyo katika kuepusha madhara zaidi ya sheria hiyo tunataka sheria hiyo ifutwe kabisa ili kujenga jamii yenye utengamano, mshikamano isiyo na chuki" alisema Masoud Msellem.

 

Aidha, alisema kuachiwa huru kwa masheikh wa uamsho kuwe mwanzo wa kutendewa haki kwa mahabusu wengi walio baki, kwani kuna mahabusu wengi wa mashtaka kama hayo ya ugaidi bado wanasota magerezani.

 

Alisema ndani ya mkoa wa Dar es salaam pekee kabla ya kuachiwa masheikh wa uamsho kulikuwa na mahabusu wa aina hiyo 140, Arusha wakiwa 60, pamoja  na Mtwara ambako wanaharakati watatu wa Hizb Ut Tanzania wamekuwa wakishikiliwa kwa mashtaka ya ugaidi karibu miaka minne(4).

 

"Tunaendelea tena kusisitiza msimamo wetu kwa Taasisi za kusimamia haki kama uliokuwa katika kampeni yetu ya Juni 2020, kwamba mahabusu wote katika mikoa mbalimbali waachiwe huru, wapewe dhamana au kesi zao zisikilizwe kwa haraka" alisema Masoud.

 

Pia, alitoa wito kwa Mamlaka husika kutoburuzwa na propaganda za magharibi kwa jina la ugaidi, na kueleza kuwa tarumbeta ya vita vya ugaidi ni chuki ya madola ya Magharibi dhidi ya uislamu na waislamu, na badala yake watafiti uislamu kupitia vyanzo vyake sahihi. 

 

Hata hivyo,  tamko hilo la Hisb Ut Tahrir Tanzania, limekuja siku chache mara baada ya Mkurugenzi wa Mashtaka(DPP) Sylvester Mwakitalu kuwafutia mashtaka masheikh wote 36 wa Jumuiya ya Uamsho na Mihadhara ya Kiislamu Zanzibar(JUMIKI),ambao wamesota magerezani kwa zaidi ya miaka 7.