MASIKINI WAZIRI WA KIKWETE,AINGIZWA KWENYE MKENGE MCHAFU NA MBIA WA KAMPUNI YA IPTL,SOMA HAPA KUJUA ZAIDI

PICHANI NI RAIS JAKAYA KIKWETE

Na Ezekiel Kamwaga

        WAZIRI wa Ardhi, Nyumba na Maendeleo ya Makazi, Profesa Anna Tibaijuka, amesema amepokea kiasi cha dola za Marekani milioni moja (Shilingi bilioni 1.65) kutoka kwa mmoja wa waliokuwa wamiliki wa kampuni ya Independent Power (IPTL), James Rugemalira.

               Kwa mujibu wa Waziri huyo, fedha hizo alipewa na mfanyabiashara huyo kama mchango wa kusaidia Shule ya Sekondari Babro ya jijini Dar es Salaam, ambayo yeye ni mmoja wa wakurugenzi wake.

               Maelezo hayo ya Waziri Tibaijuka yamekuja katika wakati ambao zimeibuka taarifa kwamba mfanyabiashara huyo ametoa fedha kwa baadhi ya vigogo wa serikali (sasa na zamani) mara baada ya kulipwa fedha kutoka katika akaunti ya Tegeta Escrow inayotajwa kugubikwa na utata.

         Katika mazungumzo yake na Chanzo hicho wiki hii, Profesa Tibaijuka, aliyewahi kuwa Mkuu wa Shirika la Umoja wa Mataifa la Makazi (UN-HABITAT), amesema alipokea fedha hizo kutoka kwa Rugemalira kwa vile alihakikishiwa ni salama na si za uovu.

           “Ni kweli kaka yangu JR (James Rugemalira) baada ya kulipwa alitoa mchango wa dola milioni moja kwa Shule ya Sekondari ya Wasichana ya Babro ili tulipe deni sugu tulilokuwa nalo Bank M. Tulichukua mkopo kwa kutumia dhamana ya nyumba yangu na kama tusingelipa basi nyumba yangu ingechukuliwa.

          “VIP walitutaka kufungua akaunti Mkombozi Bank, tukalipwa na kuhamishia fedha Bank M ili kulipa hilo deni. Malipo haya yote yalifanyika katika benki zilizopo hapa nchini na kwa upande wangu yanaonyesha nia njema niliyo nayo.

          “Sikudhani malipo hayo yaliyosimamiwa na BoT, Wizara husika na Mahakama yangelikuwa na dosari ambazo sasa zinadaiwa kuwapo kama nazo ni kweli.

         “Kimsingi, mimi bado najiuliza, hivi tatizo katika suala hili la fedha za IPTL ni VIP kulipwa fedha zake au ni namna gani ililipwa?

        “Hivi watu waliolipwa na VIP wangewezaje kujua kwamba wanalipwa fedha chafu ikiwa wenyewe hawakuhusika kabisa na utolewaji wa fedha katika akaunti ya Escrow ya BoT?” alihoji Tibaijuka.

        Chanzo hicho  halikuweza kupata maoni ya Rugemalira mwenyewe kuhusu suala hili kwa vile ilielezwa yuko nje ya nchi kwa sasa lakini sasa limejiridhisha pasi na shaka kwamba malipo hayo yalifanyika kupitia Benki ya Mkombozi.

          Mwaka jana unaonekana pia kuwa mwaka wa mavuno kwa Rugemalira kwani pia alilipwa kiasi kikubwa cha fedha na watengenezaji wa bia ya Heineken kama makubaliano ya kuvunja nao mkataba.

        Benki ya Mkombozi inamilikiwa na Kanisa Katoliki nchini kama mwenye hisa kiongozi lakini pia kuna wabia wengine wadogo.

          Chanzo hicho kimeambiwa kwamba imekuwa utaratibu wa kawaida wa Rugemalira kutumia benki hiyo katika malipo yake mengi anayofanya na kwamba kwa wale wasio na akaunti, huwataka kwanza wafungue na ndipo afanye uhamishaji wa fedha.

            Kampuni ya Rugemalira, VIP Engineering and Management (VIPEM), ilikuwa inamiliki asilimia 30 ya IPTL huku kampuni ya Mechmar Bhd ya Malaysia ikiwa na hisa asilimia 70.

          Kutokana na kiasi hicho cha hisa, Rugemalira amelipwa kiasi cha dola milioni 75 (Shilingi Bilioni 123) huku taarifa mbalimbali zilizopo zikionyesha kwamba alilipwa kiasi cha dola milioni 7.5 ( Shilingi bilioni 12.4) mwaka jana na kiasi kilichosalia alimaliziwa mwaka huu.

             Kiasi hicho cha fedha kililipwa kwa Rugemalira na kampuni ya PAP inayomilikiwa na Harbinder Singh, ambaye kwa sasa ndiye mmiliki pekee wa IPTL baada ya kununua hisa za Mechmar na zile za VIP.

           Mgogoro uliosababisha fedha kuwekwa katika akaunti hiyo ya Tegeta ya BoT ulitokana na Shirika la Umeme Tanzania (Tanesco) kugoma kulipa gharama za uwekaji mitambo (Capacity Charge) kwa IPTL mwaka 2006 kwa vile ilibainika IPTL ilikuwa ikitoza gharama kubwa kuliko iliyopaswa.

           Akaunti hiyo ya Tegeta ilianzishwa kwa sababu ya kuhifadhi fedha zote zilizopaswa kulipwa na Tanesco hadi hapo mgogoro baina ya pande hizo mbili umalizike.

         Hata hivyo, Septemba mwaka jana, serikali kupitia Wizara ya Nishati na Madini, iliagiza BoT kulipa fedha hizo kwa kampuni ya PAP mara baada ya kuridhishwa na uamuzi wa Mahakama Kuu uliosema kwamba mgogoro baina ya wamiliki wa IPTL na Tanesco umemalizika na hivyo Benki Kuu haina sababu ya kuhifadhi fedha hizo.

        Uamuzi huo wa kulipwa ulizua upinzani mkali bungeni ambapo wabunge wawili wa kambi ya upinzani; Mbunge wa Kigoma Kusini (NCCR-Mageuzi), David Kafulila na Mbunge wa Kigoma Kaskazini (CHADEMA), Zitto Kabwe, walidai kuwa zoezi hilo limejaa ufisadi.

           Hatimaye Bunge la Tanzania liliamua kwamba suala la kutolewa fedha katika akaunti ya Tegeta lifanyiwe uchunguzi wa kina na Ofisi ya Mdhibiti na Mkaguzi Mkuu wa Hesabu za Serikali (CAG) pamoja na ile ya Taasisi ya Kuzuia na Kupambana na Rushwa (Takukuru).

        Chanzo hicho kinafahamu kwamba tayari ripoti ya CAG na Takukuru imekamilika na kinachosubiriwa kwa sasa ni utekelezaji.

Chanzo ni Gazeti la Raia Mwema