MIZENGO PINDA SASA MAJI YA SHINGO, LHRC, TLS WAMKATIA RUFAA ,WASEMA NI LAZIMA ATENGUE KAULI

Makamu wa rais wa chama cha wanasheria wa Tanganyika TLS, Wakili Flaviana Charles akifafanua jambo mbele ya waandishi wa habari. Wakili Charles amesema wao kama LHRC na TLS wameridhika na tafsiri ya mahakama kuhusu ibara ya 100(2)kwamba kinga ya wabunge ina mipaka na ukomo kisheria na inapaswa kuzingatia katiba na sheria zingine za nchi, hivyo kinga hiyo inaweza kuhojiwa mahakamani, kitu ambacho ni muhimu sana katika kujenga misingi ya haki za binadam, utawala sheria na utawala bora

Wakili Mpale Mpoki, Akifafanua jambo juu ya kesi ya Mh. Waziri mkuu na Mwanasheria mkuu wa Serikali, Wakili mpoki amesema wameamua kuweka nia ya kukata rufaa ili haki za wananchi ipatikane, lengo letu ni waziri kufuta kauli yake.

Miongoni mwa mawakili wanaosimamia kesi hiyo ya Mh. Pinda na Mwanasheria mkuu wa Serikali Wakili Peter Kibatala Naye akifafanua jambo kwa waandishi wa habari

Harold Sungusia, Wakili Na Makam mwenyekiti wa Kituo Cha sheria na haki za Binadam akifafanua jambo mbele ya Waandishi wa Habari, Sungusia AMesema, wao hawana nongwa na Waziri mkuu wanachohitaji ni waziri kufuta kauli yake kwani bila kuifuta kauli hiyo madhara makubwa yatakuja achilia mbali yale tuliyoyaona katika operesheni tokomeza ujangili.;

Waandishi wa habari wakiwa makini wakisikiliza maamuzi ya wanasheria dhidi ya kesi ya pinda, Wanasheria wameazimia kuhakikisha kuwa kauli ya pinda anaifuta yeye mwenyewe ili isije ikawa kaa la moto kwa wananchi

 Na Seemani Magari,

Uamuzi uliofanywa na mahakama kuu ya Tanzania  wa kutupilia mbali  kesi  ya msingi iliyofunguliwa na Kituo cha haki za binadamu wakishirikiana na Chama cha wanasheria wa Tanganyika (TLS) dhidi ya Waziri mkuu Mh. Mizengo Pinda  na mwanasheria mkuu wa serikali  sasa imechukua sura mpya baada ya wanasheria hao kutangaza hadharani kutoridhishwa na   uamuzi huo na hivyo kudhamiria kukata rufaa ili haki iweze kupatikana,

Wakizungumza na waandishi wa habari mapema hii leo, Jopo la wanasheria toka chama cha wanasheria wa Tanganyika  wamesema hatua ya mwanasheria mkuu wa serikali kuwasilisha pingamizi mahakamani akidai kuwa maombi ya kumshitaki waziri mkuu hayakukidhi vigezo ni ishara tosha ya kuona jinsi gani haki za binadam zinavyokandamizwa,

Wanasheria hao wakiongozwa na wakili kiongozi katika kesi hiyo, Wakili Mpale Mpoki, wamesema mwanasheria wa serikali anadai wanasheria hatuna uwezo wa  kisheria kudai mahakamani kama taasisi kumtaka waziri mkuu kufuta kauli yake sababu akiitaja ni kuwa taasisi haiwezi kuathirika moja kwa moja na watu ambao wangekuwa na uwezo kisheria ni mtu binafsi ambaye angeweza kuathirika moja kwa moja na kauli ya waziri mkuu, hivyo Kituo cha sheria na Chama cha wanasheria hawana haki ya kimsingi kumsemea mtu mmojammoja,

Wakili mpoki anasema, hiyo kwa tafsiri ya haraka ni sawa na kusema, hata ukiona mwenzako anapigwa hapo na kuonewa huna mamlka ya kuweza kumsaidia kwa kupeleka kesi hiyo mahakamani kutokana na ukweli kuwa wewe hujaathirika moja kwa moja na kipigo cha huyo uliyemuona, kitu ambacho sasa tunadhani ni lazima ifike wakati tuseme inatosha,

Tumeamua kukata rufaa dhidi ya hukumu ya mahakama kuu ya Tanzania, sisi tunaona ni haki kuwatetea watanzania kwa umoja wetu sasa inapokuja suala la kusema hatuna haki sababu sisi ni taasisi sasa hilo ni tatizo na lazima ipatikane jawabu lake, Ukizingatia kauli ya muheshimiwa waziri mkuu ni sawa na sheria katika nchi hii.

Ikumbukwe kuwa mnamo tarehe 1/08/2013 kituo cha sheria na haki za binadam(LHRC) NA Chama cha wanasheria Tanganyika (TLS) walifungua kesi dhidi ya Mh. Waziri mkuu Wa Tanzania, Mh. Mizengo Pinda na Mwanasheri a mkuu wa serikali kupinga kauli ya waziri mkuu aliyoitoa bungeni mnamo tarehe 20/06/2013 alipokuwa akijibu maswali ya papo kwa papo,

Katika siku hiyo Mh. Waziri alinukuliwa akisema, “””Ukifanya fujo,umeambiwa usifanye hiki, ukaamua wewe kukaidi utapigwa tu. Eeh, Maana hakuna namna nyingine. Eeh, maana lazima tukubaliane kuwa nchi hii tunaiendesha kwa misingi ya kisheria. Sasa, kama wewe umekaidi hutaki, unaona kwamba ni imara zaidi, wewe ndio jeuri zaidi watakupiga tuu na mimi nasema muwapige tuu kwa sababu hakuna namna nyingine, Eeh, maana… maana tumechoka sasa””

Naye,Makam wa rais wa chama cha wanasheria wa Tanganyika hapa nchini, Wakili Fraviana Chalres, ameonyesha kufurahishwa kwake kwa kitendo cha Mahaka kuu hapanchini kuondoa kinga kwa wabunge na kusema kuwa hatua hiyo ni mafanikio makubwa ya kujivunia katika vita ya kuwatetea wananchi hasa wale walala hoi,

Fraviana amesema, Katika kesi ya msingi ambayo waliipeleka mahakama kuu, moja ya mashitaka yao ni kwamba ibara ya 100 ya katiba ya jamuhuri ya muungano wa Tanzania, 1977 au sheria nyingine yeyote isitumike kama kinga dhidi ya wanaovunja katiba

Katika majibu ya msingi ya mahaka,ya mnamo tarehe 6june 2014,baada ya kupitia pande zote mbili, sasa ibara ya 100(2), inaweka mipaka na ukomo wa kinga za bunge  kitu ambacho kituo cha sheria na  haki za binadamu  pamoja na chama cha wanasheria wa Tanganyika wamsema kitasaidia sana katika kulinda haki za wanachi.

Ankali akiwa kazini

“”sisi kama LHRC na TLS tumepokea uamuzi huo na tumeridhika na tafsiri ya mahakama kuhusu ibara ya 100(2)kwamba kinga ya wabunge ina mipaka na ukomo kisheria na inapaswa kuzingatia katiba na sheria zingine za nchi, hivyo kinga hiyo inaweza kuhojiwa mahakamani, kitu ambacho ni muhimu sana katika kujenga misingi ya haki za binadam, utawala sheria na utawala bora,”” Walisema.