MTEULE WA RAIS MAGUFULI MATATANI,SOMA HAPO KUJUA

John Magufuli, Rais wa Tanzania (kulia) akiwa na Paul Makonda, Mkuu wa Mkoa wa Dar es Salaam

MTEULE wa Rais John Magufuli anatajwa kuwa kikwazo katika ujenzi wa jengo la kitegauchumi lililopo katika Wilaya ya Temeke, jijini Dar es Salaam, anaandika Dany Tibason.

Ni Paul Makonda, Mkuu wa Mkoa wa Dar es Salaam ambaye amebebeshwa tuhuma hizo leo katika kikao cha Baraza Kuu kilichofanyika mjini Dodoma.

Tuhuma hizo zimetolewa na Suleiman Kikingo, Mwenyekiti wa Chama cha Wafanyakazi wa Serikali za Mitaa (TALGWU)-Taifa wakati akimkaribisha Jenistar Mhagama, Waziri wa Kazi,Vijana na Watu wenye Ulemavu aliyekuwa ngeni rasmi.

Mbali na tuhuma hizo, chama hicho kimesema Makonda amekuwa na tabia ya kujifungia ofisini kwake huku hakishindwa kuonana na viongozi wa chama hicho ili kufanya mazungumzo juu ya uendelezaji wa kitegauchumi hicho.

Kikingo amesema, serikali inatakiwa kuingilia sakata hilo ambalo limesababishwa na Makonda kabla taasisi hiyo haijachukua hatua zaidi.

Amesema Makonda amesimamisha ujenzi huo bila kuwepo kwa viongozi TALGWU kutoa hoja ya kuangalia ubora wa viwango vya ujenzi.

“Tunaiomba serikali kuhakikisha inaingilia kati suala hili maana linaonekana kutugawa,wakati wa ujenzi wa jengo letu la kitegauchumi lililopo Wilaya ya Temeke bila hata kuwepo kwa viongozi huku akitoa hoja ya ukaguzi wa viwango vya ubora wa jengo.

“Baada ya kupata taarifa hizo tumeweza kuwasilisha nyaraka zote lakini bado mkuu huyo ameendelea kukaa kimya na tulitegemea jengo hilo liwe limekamilika kati ya mwezi wa tatu au wa nane mwaka jana.

“Lakini kwa uvivu wa kutekeleza majukumu yake au chuki binafsi amezidi kukwamisha ujenzi huo na kutokana na hali hiyo, chama kinajikuta kikiingia katika hasara kutokana na kulipa mkopo ambao unariba ambayo inatakiwa kutolewa kutokana na kuchelewa kumalizika kwa jengo hilo,” amesema.

Amesema kuwa, pamoja na juhudi ya kufanya kila mbinu ya kumaliza jambo hilo, bado Makonda amegoma kukutana na viongozi.

“Amekuwa akitugandisha ofisini kwake toka saa 2 asubuhi hadi saa 12 jioni huku zikitolewa taarifa kuwa hayupo ofisini wakati yupo.

“Sisi viongozi tumekuwa tukitoka Arusha na mwingine Mtwara lakini tunapoteza nauli ambayo ni michango ya wanachama,” amesema.

Kwenye mkutano huo Mhagama amesema, jukumu hilo atalibeba kwa nia ya kutatua ili chama kiweze kupata kitegauchumi chake.

Amesema, kitendo cha kuwepo kwa kitegauchumi ni jambo jema kwa wanachama na kinaweza kuwaondolea matatizo katika masuala ya kiuchumi.

“Kama chama kitakuwa na kitegauchumi chake, kitaweza kupunguza matatizo ambayo wanachama na watumishi wa Umma wanakutana nayo kwa kunyanyaswa na taasisi za kifedha ambazo zinajifanya kuwasaidia kumbe zinawakamua,” amesema Mhagama.