MAELFU WAJITOKEZA DAR KUWALILIA WAPALESTINA…SHEIKH JALALA AONGOZA MATEMBEZI

Ikiwa ni siku mbili tokea Kiongozi mkuu wa Dhehebu la shia Ithnasheriya kuwatangazia umma wa watanzania wanaopenda Amani kujitokeza kwa wingi kushiriki matembezi ya Amani, Maelfu wameitikia wito huo na kujitokeza kushiriki matembezi hayo.

Fullhabari.com imeshuhudia wakazi wa Jiji la Daresalaam wakiacha shughuli zao na kushiriki maandamano hayo yaliyoanzia Ilala boma na kuishia katika msikiti wa Al Qadir Kigogo Jijini Daresalaam.

Wakizungumza na mtandao huu kwa nyakati tofauti, mmoja wa wananchi walioshiriki matembezi hayo, Bw. Yasini Kasim amesema awali ilikuwa ni vigumu kuelewa uzito wa matatizo wanayofanyiwa Waislamu wenzao wa Palestina lakini kutokana na taarifa ambazo wanazipata kila leo kupitia vyombo mbalimbali vya habari amejikuta amevutiwa na kuona umuhimu wa kupinga dhulma inayofanywa huko Palestina.

Kasimu alisema anawashukuru uongozi wa msikiti wa Al Qadir Kigogo kwa jitihada wanazozifanya za kutoa elimu kwa umma kuhusu suala la Palestina, kwani taratibu suala hilo limeanza kueleweka katika jamii ya watanzania.

“Wakati nipo katika gari nilisikia watu wakisema hivi hawa watu kimewakuta nini, suala la Palestina wao linawahusu nini, hawa huenda wanauhusiano na makundi ya Alshabab hivyo wanaweza kuleta vurugu na kupoteza Amani iliyopo Tanzania, hapo niliona kuwa licha ya elimu kuanza kuonekana kuenea lakini viongozi hawapaswi kubweteka kwani bado kuna kundi kubwa linalohitaji elimu”Alisema Kasim.

Naye Salim Abdallah Mkazi wa Luhanga jijini Daresalaam amesema vitendo wanavyofanyiwa Waislamu wa Palestina ni vya kizalilishaji na uonevu wa hali ya juu hivyo ni vyema wale wanaopenda Amani duniani wachukue hatua mapema kumaliza shida iliyoko Palestina.

SHEIKH JALALA AZUNGUMZA

Kwa upande wake kiongozi mkuu wa dhehebu la shia Ithnasheriya, Sheikh Hemed Jalala amesema wamefarijika kuona kuna watu wamewaunga mkono katika matembezi hayo na kwamba hiyo ni sihara kuwa watanzania wanapinga vitendo vya dhulma vinavyofanyika na wazayuni huko Palestina.

Amesema watanzania wanapaswa wafahamu kuwa suala la Palestina linashabihana kwa karibu na kulinda Amani Duniani, kwa hiyo kupinga dhulma dhidi ya Wapalestina ni sawasawa na kupigigania Amani Dunia.

Amesema athari ambazo zinajitokeza Palestina zinatisha, sasa Wapalestina wamekuwa kama wakimbizi katika Taifa lao, jambo ambalo si haki kwani wanastahili kuachiwa maeneoa yao ili waweze kuishi kwa Amani kama Tanzania nan chi zingine Duniani zinavyofanya.

Matembezi ya Amani ya Quds yanafanyika kila Ijumaa ya wiki ya mwisho wa mwezi Mtukufu wa Ramadhani, lengo likiwa ni kuwaunga mkono Waarabu wa Palestina wanaodhulmiwa mali zao, ardhi yao na kubomolewa makazi yao. Mpaka sasa tayari jumba Zaidi ya Elfu 45 zimeshabomolewa toka mwaka 1967.