Wachimbaji wadogo wa madini sasa kupatiwa mikopo isiyo na riba, STAMICO, KCB waingia makubaliano

 

Kaimu Mkurugenzi Mtendaji wa STAMICO Dkt. Vennance Mwasse (wa pili kulia) na Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro (wa pili kushoto) wakikabiadhiana hati ya makubaliano mara baada ya kumalizika zoezi la utiaji saini. Wanaoangalia kwa karibu ni Wanasheria kutoka STAMICO na Benki ya KCB, Robert Ambrozi (wa kwanza kulia) na Antonia Kilama (wa kwanza kushoto).

 

Kaimu Mkurugenzi Mtendaji wa STAMICO Dkt. Vennance Mwasse (kulia) akizungumza mbele ya waandishi wa habari (hawamo pichani) kabla ya utiaji saini wa Makubaliano hayo. (kushoto) ni Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro. 

Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro akizungumza kwenye hafla hiyo.

Kaimu Mkurugenzi Mtendaji wa STAMICO Dkt. Vennance Mwasse (kulia) na Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro (kushoto) wakitia saini hati za makubaliano makubaliano ya mashirikano katika kutoa mikopo kwa wachimbaji wadogo Jijini Dar es Salaam

Mwanasheria wa Benki ya KCB Antonia Kilama (kushoto) akikamilisha zoezi la utiaji saini kwenye hafla hiyo fupi ya makubaliano hayo yaliyofanyika kwenye Ofisi za STAMICO Jijini dar es Salaam (kulia) ni Mwanasheria wa STAMICO Robert Ambrozi akishuhudia tukio hilo. 

Kaimu Mkurugenzi Mtendaji wa STAMICO Dkt. Vennance Mwasse (kulia) na Mwakilishi wa Benki ya KCB, Mkuu wa Kitengo cha Huduma za Kiislamu wa Benki hiyo (Islamic Banking) Amour Muro (kushoto) wakibadilishana hati za makubaliano mara baada ya kutia saini makubaliano ya mashirikano katika kutoa mikopo kwa wachimbaji wadogo Jijini Dar es Salaam. Picha zote kwa hisani ya HUGHES DUGILO

Mwandishi wetu

Wachimbaji wadogo wa madini wana kila sababu ya kutabasamu kufuatia habari njema ya Shirika la Madini la Taifa (STAMICO) na Benki ya KCB kuingia makubaliano yanayolenga kushirikiana katika kutoa mikopo ya kuwawezesha kupata mikopo endelevu na kwa rahisi zaidi ili  waweze kufanya shughuli za uchimbaji zenye tija.

Kwa mujibu wa taarifa kutoka ofisi ya STAMICO kupitia kwa Kaimu Mkurugenzi wake, Dkt. Vennance Mwasse amesema mikopo hiyo inategemewa kuleta tija kwa wajasiliamali lakini pia kwa taifa.

“Mpaka sasa wachimbaji wadogo wanaongoza kwa kupatiwa leseni ukizingatia na wadau wengine, kimsingi unaposema  wachimbaji wadogo maana yake ni wazawa, hadi sasa leseni 34,000 zimeshatolewa, makubaliano haya yatawasaidia watanzania kuleta tija katika biashara zao,” alisema Dkt Mwasse

 

Makubaliano hayo yamefikiwa baada ya kusaini Hati ya makubaliano (MOU) baina ya pande hizo mbili Novemba 16, 2021 katika Ofisi za STAMICO Jijini Dar es Salaam. 

 

Akizungumza wakati wa utiaji saini wa Makubaliano hayo, Kaimu Mkurugenzi Mtendaji wa STAMICO Dkt. Vennance Mwasse amesema kuwa Malengo ya makubaliano hayo ni kushirikiana na Taasisi za fedha katika kuwasaidia wachimbaji wadogo kupata mikopo endelevu na yenye tija.

 

"Katika Makubaliano haya STAMICO itawajibika kutoa utaalam elekezi katika maeneo ya Jiolojia, Uchimbaji na Uchenjuaji Madini kwa miradi ya Wachimbaji Wadogo ambayo itafanya maombi ya mikopo na kuiwasilisha kwa Benki kabla ya utekelezaji wake na Benki ya KCB itawajibika kutoa mikopo kwa Wachimbaji Wadogo ambao watawasilisha maombi ya mikopo katika maeneo ya miradi ya uchimbaji madini itakayokidhi vigezo vya kupewa mikopo.Amesema Dkt. Mwasse.

 

Ameongeza kuwa Makubaliano hayo yatadumu kwa muda wa miaka mitatu (3) kuanzia mwaka huu wa 2021 ambapo pia yanaweza kufanyiwa mapitio kila baada ya mwaka mmoja (1).

 

Kwa upande wake Mwakilishi wa Benki ya KCB, Mkuu wa Kitengo cha Huduma za Kiislamu (Islamic Banking) Amour Muro amesema wafanyabiashara ambao wanaogopa kukopa kwa sababu ya riba sasa hawana cha kuogopa kwa sababu wako tayari kutoa mikopo hiyo bila riba yeyote.

Aidha amesema suala la riba halibagui dini, mfanya biashara yeyote anayetaka kukopa bila kula ripa anachopaswa ni kusema na KCB wako tayari kuwahudumia.

Aidha Mtaalamu huyo wa mambo ya fedha amesema ametoa wito kwa wachimbaji wadogo waislam na wasio waislam kujitokeza kuchukua mikopo isiyo na riba.

 

"Mpaka sasa Benki yetu tayari imeshatoa mikopo yenye thamani ya Shilingi Bilioni 4 kwa wateja wetu wote na sasa tupo tayari kuwafikia wachimbaji wadogo kwa kuwakopesa ili waweze kufanya shughuli zao" Amesema Amour.

 

STAMICO imendelea kutekeleza mikakati yake ya kuendeleza shughuli za uchimbaji mdogo nchini ili uwe wenye tija na kuchangia ipasavyo uchumi wa nchi ikiwa ndio Mlezi wa Wachimbaji Wadogo hapa nchini.