TMA wajichimbia Morogoro kufanya tathmini, M’kiti awataka wakusanye mapato

Na Suleimani Magali

Mwenyekiti wa Bodi ya Mamlaka ya Hali ya Hewa Tanzania (TMA), Dkt. Buruhani Nyenzi amewapongeza watendaji wa mamlaka hiyo kwa kukamilisha zoezi la kuandaa kanuni za kutekeleza sheria namba 2 iliyotungwa mwaka 2019 ikiwemo kanuni ya tozo. Pia Dkt Nyenzi ameiagiza TMA kusimamia sheria kikamilifu.

Akizungumza katika semina ya ufunguzi wa Baraza la Wafanyakazi wa Mamlaka ya Hali ya Hewa Tanzania (TMA), lililofanyika katika Ukumbi wa Magadu, Morogoro, Dkt Nyenzi amesifu utendaji kazi wa mamlaka huku akiwasisitiza wajitahidi katika suala la kukusanya mapato.

“Nawaagiza mkasimamie Sheria hii kikamilifu ikiwa ni pamoja na ukusanyaji wa mapato katika maeneo yaliyoainishwa. Hii itasaidia kuwezesha utekelezaji wa majukumu yenu kwa ufanisi mkubwa pamoja na kutatua changamoto mbali mbali zilizo katika uwezo wenu”.Alisema Dkt. Nyenzi

“Nimejulishwa pia kuwa ili kutekeleza sheria iliyoanzisha taasisi hii mmefanikiwa kuandaa kanuni zitakazowezesha utekelezaji wa sheria hiyo. Katika eneo hili, niwapongeze kwa kukamilika kwa Kanuni saba za Sheria ya Mamlaka ya Hali ya Hewa Tanzania Na. 2 ya mwaka 2019 ikiwemo Kanuni ya Tozo, natambua kuwa kanuni hizi zimeshasainiwa, kilichobaki ni utekelezaji wake”.Alizungumza Dkt. Nyenzi.

Aidha, Dkt. Nyenzi aliipongeza TMA kwa kazi nzuri inayofanya na kuwataka kuchapa kazi kwa bidii na kuendelea kutoa taarifa kwa watoa maamuzi ili kusaidia ufanyaji wa maamuzi na kuwezesha Serikali kukabiliana na changamoto zinazosababishwa na matukio ya hali mbaya ya hewa ambayo yanazidi kuongezeka kutokana na mabadiliko ya tabianchi.

Akizungumzia ushiriki wa TMA katika Mkutano mkubwa wa mabadiliko ya tabia nchi maarufu COP26 ambao Mhe. Samia Suluhu Hassan, Rais wa Jamhuri ya Muungano wa Tanzania alishiriki na kuhutubia mkutano, Dkt Nyenzi alisema anatambua katika maazimio ya mkutano huo TMA inajukumu la kufanya ili kufanikisha jitihada za kuhimili athari za mabadiliko ya tabia nchi.

Amesema anaamini jukumu hilo litatimizwa vyema kwani TMA ina wataalamu wanaokubalika kimataifa wakiwemo wajumbe katika kamati mbali mbali za Shirika la Hali ya Hewa Duniani akiwemo Mwenyekiti wa Baraza anayeshika nafasi ya Makamu wa tatu wa Rais wa Shirika la Hali ya Hewa Duniani

Kwa upande wake, Mkurugenzi Mkuu wa TMA na Makamu wa Tatu wa Rais wa Shirika la Hali ya Hewa Duniani (WMO) Dkt. Agnes Kijazi aliishukuru Serikali na kueleza madhumuni maalum ya Baraza hilo ni kufanya tathmini ya utendaji wa Mamlaka.

Amesema wanaamini tathmini itasaidia kuongeza ubora na ufanisi katika utoaji wa huduma kwa umma kwa lengo la kupunguza athari za mabadiliko ya hali ya hewa na tabia nchi.

“Hivi karibuni tumeshuhudia athari mbalimbali zitokanazo na mabadiliko ya hali ya hewa na tabianchi ikiwa ni pamoja na kuwa na vipindi vya ongezeko la joto hadi kufikia nyuzi joto 35.6 kwa maeneo ya ukanda wa Pwani.

Aidha, nichukuwe fursa hii kuendelea kutoa wito kwa watanzania wenzangu kuendelea kufuatilia taarifa za hali ya hewa zinazotolewa na Mamlaka ya Hali ya Hewa Tanzania kila mara ili kupunguza madhara yatokanayo na hali mbaya ya hewa”.Alifafanua Dkt. Kijazi.

Vile vile, Dkt. Kijazi alieleza baadhi ya changamoto zinazoikabili mamlaka hiyo ni pamoja na ni mishahara midogo hali inayopelekea wataalamu kuhamia katika Taasisi zingine.

Hata hivyo amesema jambo hilo litafika mwisho mara tu ‘Job Evaluation’ itakapofanyiwa kazi,