Mtendaji mkuu NDC aanza na watendaji, awaasa waache mazoea

 

MKURUGENZI Mwendeshaji wa Shirika la Taifa la Maendeleo NDC, Dkt Nicolaus Shombe akizungumza na watendaji wa shirika

MKURUGENZI Mwendeshaji wa Shirika la Taifa la Maendeleo NDC, Dkt Nicolaus Shombe akizungumza katika kikao hicho

Na Suleiman Magali

MKURUGENZI Mwendeshaji wa Shirika la Taifa la Maendeleo NDC, Dkt Nicolaus Shombe amewataka wafanyakazi kuacha kufanya kazi kwa mazoea badala yake wajikite katika kufanya kazi kwa viwango vya juu ili kulifanya shirika kuwa la mfano.

Dkt Shombe ambaye ameteuliwa hivi karibuni kuliongoza shirika hilo baada ya kifo cha Prof Damiani Gabagambi, amesema asingependa kuona watu wanafanya kazi kwa wanavyojisikia na kulipelekea shirika kushindwa kufikia ndoto zake za kutekeleza miradi kwa wakati.

Amesema anatamani kuona watu wanafanya kazi kwa juhudi na maarifa ili kuhakikisha wanafikia ndoto ya kuwa shirika bora  na la mfano kwa kutekeleza miradi mbalimbali ya kimkakati ya serikali  pamoja na kushirikiana na sekta binafsi katika kukuza sekta ya viwanda hapa nchini.

Dkt Shombe ameyasema hayo mara baada ya kuwasili rasmi katika ofisi za Makao Makuu ya NDC na kuanza kazi mara moja.

 “Ninawaombeni sana ushirikiano wenu tukiwa kama familia moja, tushirikiane pamoja katika kuhakikisha Shirika linasonga mbele. Tukishirikiana tutaweza kuzitatua changamoto mbalimbali zinazotukabili,” Alisema Dkt Shombe

nitahakikisha tunatenga muda maalum ambao tutakuwa tunakutana na menejimenti,wakuu wa Idara pamoja na wafanyakazi wote ili kusiwe na utofauti mkubwa baina ya viongozi pamoja na watumishi wa kawaida lengo likiwa ni kujenga teamwork ” Alisema Dkt Shombe.

Dkt Shombe amehaidi kuzitendea kazi changamoto mbalimbali zilizo ibuliwa na wafanya kazi huku akiwataka wafanyakazi kubainisha fursa wanazoziona na mikakati ya kuzitumia kwa maendeleo ya viwanda nchini.

Kwa upande wake aliyekuwa Kaimu Mkurugenzi wa NDC,ambaye kwa sasa ni Mkurugenzi wa Fedha  Rhobi Sattima alimpongeza Dkt Shombe kwa kuaminiwa na Rais na kuteuliwa kuwa Mkurugenzi Mwendeshaji wa NDC huku akisema kuwa ana imani ataifanyia makubwa NDC.

“Mkurugenzi ninakumbuka siku moja wakati uko Hazina kama Kamishina wa Mipango ulitusaidia sana katika kuhakikisha kuwa taasisi inawezeshwa kifedha na nadhani ulifanyika kuwa kama malaika kwani hatimaye leo umeteuliwa rasmi kuwa Mkurugenzi Mwendeshaji wa Shirika Hongera sana kwani tunamatumaini makubwa na ujio wako”Alisema Bi Rhobi Sattima.

Ujio wa Dkt Shombe kuwa Mkurugenzi mpya wa NDC umepokelewa vizuri na wafanyakazi ambao wamehaidi kumpa ushirikiano wa kutosha ili kuhakikisha anatimiza adhima ya shirika hilo.

Malengo ya shirika hilo ni pamoja na kuwa kinara katika ujenzi wa Tanzania ya viwanda pamoja na kuvutia na kujenga mazingira bora wezeshi kwa wawekezaji wa ndani na nje ya nchi.

Uteuzi wa Dkt Shombe kushika nafasi ya Mkurugenzi Mwendeshaji wa NDC na Rais umefanyika mara baada ya kufariki Dunia kwa aliyekuwa Mkurugenzi wa NDC Prof Damiani Gabagambi ambaye alifariki dunia Mwishoni mwa mwaka jana ambapo kabla ya kuteuliwa na Rais kuwa mtendaji mkuu wa NDC Dkt Shombe alikuwa anashika nafasi ya Kamishina wa Mipango ya Kitaifa kwenye Wizara ya Fedha na Mipango.