Kongamano la biashara kati ya Uingereza na Tanzania kufanyika Dar kesho

 

Tanzania inataraji kufanya Kongamano la kibiashara baina yake na Nchi ya Uingereza hapo kesho dhamira ikiwa kuendeleza mahusiano makubwa yaliopo kati ya nchi hizo mbili.

 Kongamano hilo litafanyika kwa mara ya kwanza jijini Dar es Salaam ambapo mada mbalimbali zitazungumzwa huku Tanzania ikipanga kupigia debe biashara ya nyama ambayo bado haina soko la kutosha nje ya nchi.

Akizungumza na waandishi wa habari, Waziri wa biashara na viwanda Prof. Kitila Mkumbo  amesema kwa mujibu wa takwimu za Kituo cha Uwekezaji nchini (TIC) Nchi ya Uingereza ni ya pili kwa uwekezaji ikiwa na miradi 945 yenye thamani ya Dola za Marekani 5.42 bilioni na kutoa ajira 275,384.

 

Aidha takwimu za Serikali ya Uingereza zinaonyesha jumla ya thamani ya biashara baina ya nchi hizi mbili kwa mwaka 2021 ilikuwa ni pauni za Uingereza 156 milioni, huku nchi hiyo ikiuza hapa nchini bidhaa zenye thamani ya Pauni 127 milioni, na Tanzania ikiuza Uingereza bidhaa zenye thamani ya Pauni milioni 29.

Kwa upande wake, Balozi wa Uingereza nchini, David Concar amesema kongamano hilo lina umuhimu kwa nchi zote kwani linakwenda kufungua fursa mpya za uwekezaji zilizopo.

Kongmano hilo limeratibiwa na Wizara ya Viwanda na Biashara kwa kushirikiana na Ofisi ya Waziri Mkuu (Uwekezaji), Ubalozi wa Uingereza hapa nchini pamoja na Taasisi ya Sekta Binafsi Tanzania (TPSF).

Kongamano la Biashara kati ya Tanzania na Uingereza (Tanzania - UK Business Forum) litarajiwa kufanyika Novemba 16, 2021 katika Kituo cha Kimataifa cha Mikutano wa Mwalimu Julius Nyerere (JNICC), Dar es Salaam.  

 

Kongamano hilo litafunguliwa na Waziri Mkuu wa Jamhuri ya Muungano wa Tanzania Mhe. Kassim Majaliwa Majaliwa (Mb.), na kuhudhuriwa pia na Mjumbe Maalumu wa masuala ya Biashara wa Waziri Mkuu wa Uingereza, Bw. Lord John Walney. Aidha, washiriki takriban 200 kutoka Serikali na Sekta Binafsi za nchi hizi mbili  watahudhuria Kongamano hilo na wengine wengi zaidi watashiriki kwa njia ya mtandao (virtually).

Kongamano hilo ambalo limeandaliwa kwa namna ya kipekee linatarajiwa kuwa na makundi matatu yatakayofanya mijadala kwa wakati mmoja, yaani, majadiliano kati ya Serikali ya Tanzania na Serikali ya Uingereza (Government to Government-G2G), majadiliano baina ya Sekta Binafsi ya Tanzania na Sekta Binafsi ya Uingereza (Business to Business-B2B) pamoja na mdahalo kati ya Serikali na Sekta Binafsi (Government to Business-G2B). 

Kauli mbiu ya Kongamano hilo ni "Kuimarisha Ustawi Endelevu wa Kiuchumi kati ya Tanzania na Uingereza" (Strengthening Mutual Sustainable Economic Prosperity). 

Pamoja na mambo mengine, inatarajiwa kuwa Kongamano hilo litatoa fursa kwa washiriki kujadiliana kwa kina na kubaini fursa mpya za ushirikiano baina ya nchi hizi mbili.

 Aidha, kupitia majadiliano hayo, pande zote mbili zitaweza kupanua zaidi wigo wa ushirikiano katika maeneo ya biashara na uwekezaji – hususan katika sekta za nishati, madini, miundombinu, kilimo, uchumi wa buluu na utalii.

 Inatarajiwa pia kupitia Kongamano hilo, changamoto mbalimbali za kisera zilizokuwa zikiwakabili wawekezaji kutoka Uingereza zitajadiliwa na kutafutiwa ufumbuzi. 

 Nchi ya Tanzania na Uingereza zina mahusiano ya karibu ya muda mrefu ambayo yamekuwa yakiimarika siku hadi siku kutokana na mashauriano ya mara kwa mara baina ya Serikali za pande zote mbili.

Hivyo, Kongamano hili linalenga, pamoja na mambo mengine, kujadili na kuridhia mikakati ya pamoja itakayolenga kupunguza pengo hilo kubwa la urari wa biashara kwa kukuza zaidi mauzo ya bidhaa za Tanzania nchini Uingereza.