JAJI ALIYERUHUSU UCHOTWAJI WA MABILIONI YA ESCROW KUHUKUMU HATMA YA UBUNGE WA KAFULILA,SOMA HAPO KUJUA

Kesi ya kupinga matokeo ya uchaguzi iliyofunguliwa na aliyekuwa Mbunge wa Kigoma Kusini (NCCR-Mageuzi), David Kafulila, kupinga matokeo ya uchaguzi itaanza kusikilizwa leo na Jaji John Utamwa katika Mahakama Kuu ya Tanzania, Kanda ya Tabora.

Kafulila aliyekuwa Mbunge kinara katika kuibua ufisadi wa sakata la uchotwaji wa zaidi ya Sh. bilioni 306 katika akaunti ya Tegeta Escrow iliyokuwa Benki Kuu ya Tanzania (BoT), anakutana ‘uso kwa uso’ na Jaji Utamwa, ambaye ndio alitoa hukumu tata iliyosababisha kuibuka kwa kashfa ya ufisadi wa fedha hizo.

Jaji Utamwa aliitoa hukumu hiyo, Septemba 8, 2013 kwa kumwamuru Kabidhi Wasihi, kukabidhi mtambo wa Kampuni ya kufua umeme wa dharura ya Independent Power Tanzania Limited (IPTL) kwa mmiliki wake mpya ambaye ni kampuni ya Pan Africa Power Solutions Tanzania Limited (PAP) baada ya kukubaliana na maombi ya aliyekuwa mbia wa IPTL, kampuni ya Engineering and Marketing Limited (VIP) iliyoondoa kesi yake kwa lengo la kuifilisi IPTL.

Hukumu hiyo ndio ilikuwa chanzo cha Kafulila kuibua kashfa hiyo bungeni kwa kuwahusisha vigogo mbalimbali wa serikali na ufisadi huo.

Hatua hiyo ya Kafulila ilisababisha serikali kumuelekeza Mdhibiti na Mkaguzi Mkuu wa Hesabu za Serikali (CAG) na Taasisi ya Kuzuia na Kupambana na Rushwa (Takukuru) kuchunguza kashfa hiyo.

Takukuru na CAG ziliwasilisha matokeo ya uchunguzi huo kupitia Kamati ya Bunge ya Hesabu za Serikali (PAC). 

Taarifa ya uchunguzi huo iliyowasilishwa bungeni mwishoni mwa mwaka jana na aliyekuwa Mwenyekiti wa PAC, Zitto Kabwe, iliwahusisha vigogo kadhaa wa serikali wakiwamo waliopewa mgawo wa mamilioni ya Shilingi kupitia benki mbalimbali nchini.

Kashfa hiyo ilisababisha kujiuzulu kwa Mwanasheria Mkuu wa zamani wa Serikali, Jaji Frederick Werema na pamoja na aliyekuwa Waziri wa Nishati na Madini, Profesa Sospeter Muhongo.

Aliyekuwa Waziri wa Ardhi, Nyumba na Maendeleo ya Makazi, Profesa Anna Tibaijuka, alifutwa kazi na Rais mstaafu, Jakaya Kikwete.

Pia wabunge kadhaa waliondolewa katika nafasi za uenyekiti wa kamati za Bunge na baadhi ya watendaji wa serikali walifunguliwa mashauri katika Baraza la Maadili huku wengine wakifunguliwa kesi mahakamani.

KESI YA KUPINGA MATOKEO YA UBUNGE

Jaji Utamwa atasikiliza leo ombi la malipo ya dhamana ambalo Kafulila atatakiwa kulipa kwa kufungua kesi ya kulalamikia matokeo.

Kafulila anaomba apunguziwe kiasi cha dhamana ili asilipe Sh. milioni 15 kwa kuwalalamikia walalamikiwa watatu.

Walalamikiwa hao ni aliyekuwa mgombea wa Chama Cha Mapinduzi (CCM), Husna Mwilima, aliyeshinda katika uchaguzi wa ubunge wa Oktoba 25, mwaka huu kwa kupata kura 34, 453 dhidi ya kura 33,382 alizopata Kafulila.

Mlalamikiwa mwingine ni aliyekuwa Msimamizi wa Uchaguzi ambaye pia ni Mkurugenzi Mtendaji wa Halmashauri ya Uvinza, mkoani Kigoma, Ruben Mfune, na Mwanasheria Mkuu wa Serikali, George Masaju.

Kwa mujibu wa sheria, mlalamikaji anapofungua kesi ya kupinga matokeo ya ubunge mahakamani, anatakiwa kuweka dhamana ya Sh. milioni tano kwa kila mlalamikiwa. Kwa maana hiyo, Kafulila atatakiwa kuweka Sh. milioni 15 kwa walalamikiwa wote watatu, hivyo, anaiomba Mahakama ipunguze kiasi hicho.

 Katika kesi hiyo, Kafulila analalamika kuwa matokeo yaliyotangazwa na msimamizi huyo wa uchaguzi hayakuwa ya halali, hivyo kuiomba Makakama kumtangaza yeye kwa maelezo kuwa ndiye mshindi halali.

Kadhalika, anaiomba Mahakama kuiamuru Tume ya Taifa ya Uchaguzi (Nec) kujumlisha upya matokeo hayo kutoka katika vituo 382, ambavyo anadai ana fomu zake za matokeo na baada ya hapo kumtangaza mshindi.

Kafulila pia anamlalamikia msimamizi wa uchaguzi huo kwa kutangaza matokeo hayo kufuatia shinikizo la Mkuu wa Mkoa wa Kigoma, Issa Machibya na viongozi wengine wa serikali wa wilaya ya Uvinza.

CHANZO: NIPASHE