MAHAKAMA KUU PACHIMBIKA TENA,WAKILI KIBATALA AIENYESHA SERIKALI,SASA MAHAKAMA KUAMUA KESHO MITA 200,SOMA HAPO KUJUA

NA KAROLI VINSENT

ZIKIWA zimesalia siku tatu kuelekea Uchaguzi Mkuu, Mahakama Kuu ya Tanzania, Kanda ya Dar es Salaam, kesho inatarajia kutoa uhamuzi katika kesi ya kikatiba kuhusu umbali wa mita 200 wanaotakiwa kukaa wapigakura baada ya kupiga kura.

Katika kesi hiyo namba 37/2015 iliyofunguliwa na mpigakura Amy Kibatala, ilianza kuunguruma mahakamani hapo tangu mwanzoni mwa wiki chini ya Jopo la Majaji watatu.

Wakati uhamuzi huo ukisubiliwa kwa hamu kesho,ambapo jana Mahakama iliahirisha kesi hiyo kutokana na mvutano wa kisheria baina ya pande mbili kati ya mlalamikaji aliyewakilishwa na Wakili Peter Kibatala, huku upande wa Serikali, ukiwa na wanasheria nane, wakiongozwa na Mwanasheria Tulia Akson.

Katika mvutano huo, ulioanza saa 3:17 asubuhi na kufikia tamati saa 11 jioni, Wakili Kibatala aliiomba mahakama iangalie maana ya kifungu cha 104 katika haki ya wapigakura kukaa kwa utulivu umbali wa mita 200 pamoja na kutoa tamko kwa wapigakura na watu wenye shauku kwamba wana haki ya kukaa umbali huo kwa utulivu.

“Majaji msingi wa shauri hili ni kuwa mara kadhaa NEC (Tume ya Taifa ya Uchaguzi) imekuwa ikitoa tamko kwamba wapigakura na watu wenye shauku ya kufuatilia mwenendo wa matokeo wasikae popote baada ya mchakato huo, ambapo inadaiwa katazo hilo limetoka kwenye kifungu cha 104,”alieleza Kibatala.

Kwa upande wa Serikila, Mwanasheria Akson alidai kuwa shauri hilo litupiliwe mbali na mahakama, kwani NEC haikuvunja sheria kwa kutoa agizo hilo la umbali wa mita 200.

Kutokana na mvutano huo, Jopo hilo la majaji likiongozwa na Mwenyekiti Jaji Sakieti Kihiyo liliahirisha kesi hiyo hadi jana ili itolewe maelezo maalum.

Hata hivyo, shahuku ya Wanasheria kutoka pande zote mbili na watu mbalimbali waliofika mahakamani hapo jana kufatilia kesi hiyo, ilikatika baada ya Jaji Kihiyo kusema kwamba uhamuzi utatolewa kesho.

Jaji Kihiyo alisema wakati wanaahirisha shauri hilo jana, walisisitiza kwamba kesi hiyo ingetajwa jana kwa ajili ya kutolewa maelezo maalum, hivyo maelezo hayo ni uahamuzi utakaotolewa kesho.

“Leo tulisema kwamba tutatoa maelezo maalum, kuhusu kesi hii… hivyo maelezo hayo ni kwamba tukutane kesho saa nne asubuhi kwa ajili ya kutoa uhamuzi,”alisema Jaji Kihiyo.

Mara baada ya jopo hilo kutoka katika chumba cha mahakama, ilisikika minong’ono baadhi ya watu wakidai kwamba hakuwatarajia kusikia hivyo.