“WANAWAKE MILIONI 214 DUNIANI HAWATUMII NJIA ZA UZAZI WA MPANGO”- UNFPA

Ikiwa imesalia siku moja kabla ya kufikia Siku ya Idadi ya Watu Dubniani, Shirika la Umoja wa mataifa linaloshughulikia Idadi ya Watu (UNFPA) limetoa taarifa kwa wananchi kuhusu siku hiyo.

Akisoma taarifa kwa niaba ya Mwakilishi Mkazi wa Shirika la Umoja wa Mataifa linaloshughulikia Idadi ya Watu Duniani (UNFPA), Dk. Hashina Begum alisema idadi ya watu duniani imekuwa ikiongezeka na wanaoathirika zaidi ni wanawake na sababu kubwa ikiwa ni kutotumia uzazi wa mpango.

“Kila siku wanawake waliopo katika mazingira hatarishi na hasa masikini na wakimbizi wanakumbana na changamoto za kijamii, kiuchumi na kijografia zinazosababisha kukosa huduma za mpango wa uzazi … pamoja na hatua kubwa ziliyopigwa wanawake milioni 214 katika nchi ambazo zinaendelea hawatumii njia yoyote ya uzazi wa mpango na wengi wao wanaishi katika nchi 69 ambazo ni masikini,

“Afya ya uzazi wa mpango iiliyo nzuri inaweza kukuka uchumi na kuchangia maendeleo endelevu kwa kuwapa wanawake fursa ya kumaliza elimu na kuwa sehemu ya nguvu kazi ya kuchangia pato la familia na taifa kwa ujumla,” alisema Hashina.

Aidha Dk. Hashina alizungumza kuhusu mipango ya UNFPA wa kukabiliana na ongezeko la watu kwa kutumia njia ya uzazi wa mpango, “Uzazi wa mango ni lengo namba moja la malengo 17 ya maendeleo endelevu (SDGs) la kumaliza umasikini, shirika limejipanga kuhakikisha changamoto za ukosefu wa afya ya uzazi wa mpango zinaisha mwaka 2030.”

Naye Mratibu wa Dawa za Uzazi wa Mpango kutoka Wizara ya Afya, Dk. Cosmas Swai alisema kitaifa siku ya Idadi ya Watu Duniani itafanyika katika viwanja vya Mwembeyanga vilivyopo Manispaa ya Temeke, Dar es Salaam na huduma mbalimbali kuhusu uzazi wa mpango zitakuwa zikitolewa na Wizara ya Afya, UNFPA na taasisi zingine zisizo za kiserikali.