MCHEZO MCHAFU ZANZIBAR WABAINIKA,CCM NA POLISI WAHUSISHWA,SOMA HAPO KUJUA

Askari wakiwa kwenye meli wakisafirishwa kwenda kisiwani Pemba

MAANDALIZI ya Chama Cha Mapinduzi (CCM) kushika dola visiwani Zanzibar yanafanywa kwa kutumia vitisho vya kijeshi, anaandika Mwandishi Wetu.

Mwandishi wa habari hizi aliyepo visiwani humo anaarifa kwamba, kinachofanywa kwa sasa ni kuzidisha hofu kwa Wazanzibari ili kupunguza misimamo ya kugomea uchaguzi huo jambo ambalo linatajwa kutoiacha Zanzibar salama.

Mwandishi huyo aliyepo Darajani, Zanzibar anaarifu kuwa, tayari wananchi wanaamini kwamba visiwa hivyo (Pemba na Unguja) vinaweza kuvurugika muda wowote kutokana na matukio yaliyotangulia pia kuongezwa kwa wanajeshi pamoja na vifaa vyao.

“Yapo mambo ambayo yanaongeza hofu zaidi, idadi kubwa ya wanajeshi hapa visiwani inaongeza wasiwasi. Lakini bado kuna kundi la watu ambao wanaonekana kabisa kutoogopa chochote,” anaarifu mwandishi huyo leo asubuhi na kuongeza;

“Chama cha CUF hakijatikisika mpaka sasa, taarifa yao ya jana bado inaonesha kuwashibisha wanachama wake kuendelea kuwa na msimamo kama wa viongozi wao.”

Jana Hamad Masoud Hamad, Kaimu Mkurugenzi wa Habari, Mawasiliano na Umma CUF amethibitisha kuwepo kwa hofu inayojengwa na Serikali ya CCM visiwani humo akitaja sehemu ya hofu hiyo kuwa ni kuongezwa kwa wanajeshi huku wengine wakiepelekwa Pemba ambapo ndio ngome kuu ya CUF.

“Jamani, kwani kuna nini Pemba mpaka ifikie hali hii au kwa sababu wananchi wameikataa CCM?” amehoji Hamad na kuongeza kwamba, tayari wananchi visiwani humo wameanza kuhama makazi yao na kukimbilia njia ya kuelekea Mombasa, Kenya.

Hofu hiyo inajengwa pia na mauaji yaliyofanywa mwishoni mwa Desemba 2000 chini ya uatwala wa Benjamin Mkapa ikiwa ni mara ya kwanza kwa Tanzania kuzalisha wakimbizi nje ya nchi kwa sababu za kisiasa.

Jana, viongozi wa dini walikutana visiwani humo kuzungumzia amani huku wakihimizana kukataa kudumishwa kwa njia ya mtutu.

Mwandishi wetu anasema, viongozi wa serikali visiwani humo wamekuwa wakifanyia kazi kwa ukakamavu kauli ya Rais John Magufuli aliyoitoa wakati alipokutana na wazee wa CCM Dar es Salaam kwamba, atawashughulikia wale watakaoleta fyokofyoko.

Anaarifu kuwa, hali ilivyo kwa sasa Zanzibar ina viashiria vyote vya matumizi ya nguvu katika kuhakikisha kwamba, CCM inaendelea kukalia usukani wa kuongoza kisiwa hicho licha ya matokeo ya tarehe 25 Oktoba mwaka jana kuonesha kushindwa.

Tume ya Uchaguzi Zanzibar (ZEC) imetangaza marudio ya uchaguzi visiwani humo baada ya kufuta ule wa Oktoba mwaka jana kinyume cha katiba.

Kwenye uchaguzi huo vyama 10 kati ya 14 vimegoma kushiriki lakini ZEC imelazimisha na kuviweka kwenye orodha ya vyama vitakavyoshiriki.

Habari hii kwanisani ya Mwanahalisi oline

·