DC MAKONDA AWALIZA MISS IFM AWAINGIZA MJINI,SOMA HAPO KUJUA

MKUU wa Wilaya ya Kinondoni, mkoani Dar es Salaam, Paul Makonda analalamikiwa kuwa amesaliti ahadi yake ya fedha kwa warembo watatu walioshinda shindano la urembo la Miss IFM 2015 akilaumiwa kukwepa kuwajibika. Anaandika Yusuph Katimba … (endelea).

         Katika shindano hilo lililofanyika Mei mwaka huu, Makonda aliyeteuliwa DC mapema mwaka huu, alialikwa kuwa mgeni rasmi na alipohutubia hadhara baada ya washindi kutangazwa, aliahidi kuwapa zawadi ya Sh. 500,000 kila mmoja.

          Makonda alikuwa amebadili aina ya ahadi kwani alitangulia kusema kwamba atampatia kila mrembo kompyuta moja.

          Baadaye ndio akaueleza umma uliohudhuria shindano hilo lililofanyika kwenye ukumbi wa jengo la PSPF Diamond Jubilee, Ghorofa ya Tano, kuwa atampatia kila mrembo Sh. 500,000 na akaelekeza warembo hao kumfuata ofisini kwake Jumatatu iliyofuata ili awakabidhi.

           Zimepatikana taarifa kuwa Makonda hajatimiza ahadi yake hiyo mpaka Jumanne siku ambayo Makonda alipigiwa simu na kuulizwa msimamo wake kuhusu suala hilo.

              “Kwani wewe inakuhusu nini, waulize wenyewe,” ndivyo alivyojibu. Lakini alipoambiwa kwamba warembo ndio wanaolalamika na wamejieleza, Makonda alikata simu na hakupatikana tena alipopigiwa mara kadhaa.

Awali alikiri kualikwa na wadhamini wa shindano la Miss IFM 2005 na pia kwamba alitoa ahadi ya kutoa fedha.

                Mtoa taarifa ambaye hakutaka kueleza utambulisho wake, zaidi ya kusema, “nimezipata za uhakika kutoka ndani ya familia ya mrembo mmoja,” alisema warembo hao wamefika mara kadhaa ofisini kwa Makonda lakini badala ya kutimiza ahadi “anawasumbua kwa njia mbalimbali.”

“Baada ya kuwasiliana naye alituambia twende na tulipoenda tukaambiwa hayupo. Tukaondoka, tulipowasiliana naye tena na kumpata, akatuahidi, lakini kila tukifika pale ofisini tunaviona viashiria vyote vya huyu mheshimiwa kutukwepa,” amenukuliwa mrembo mmojawapo.

Chanzo kingine kimesema kimepata taarifa kwenye duru za habari ndani ya Chuo cha Usimamizi wa Fedha Dar es Salaam zikimnukuu mrembo akisema, “Tumekata tamaa, hatujui hasa sababu za mheshimiwa huyu kuahidi na kisha kushindwa kutekeleza ahadi yake. Naamini anatukimbia.”

Kwa mujibu wa ofisa mmoja kati ya walioratibu shindano hilo, ndiye aliyemshawishi kuhudhuria na kumpa heshima ya kuwa mgeni rasmi katika shindano.

Ofisa huyo amekuwa akiwasiliana na warembo hao kuwauliza kama wameshapata zawadi zao kutoka kwa Makonda lakini anasikitika kujibiwa hawajapata.

“Ninasikitika kwamba mheshimiwa mwenyewe aliahidi warembo wenyewe waende ofisini kwake kufuatilia kesho yake, sasa inakuwa vigumu mtu mwingine kufuatilia,” amesema alipoulizwa kama haoni anawajibika kuulizia kwa Makonda mwenyewe.

“Inakuwa vigumu kufuatilia mimi binafsi, kwa sababu waliokuwepo ukumbini walisikia mwenyewe akitaka warembo wafike ofisini kuchukua zawadi zao,” amesema.

Muongozaji shughuli siku ya shindano la Miss IFM 2015 alikuwa msanii wa vichekesho wa kundi la Ze Comedy, Mpoki ambaye alilinogesha vilivyo.

Habari hii kwahisani ya Mwanahalisi oline