HABARI KUBWA LEO,KAMANDA MBOWE ATOKA WODINI,ASEMA MAPAMBANO YANAENDELEA,SOMA HAPO KUJUA

Mwenyekiti wa Chadema, Freeman Mbowe (katikati) akizungumza na waandishi wa habari
 juu ya afya yake, akiwa hospitali ya Muhimbili.
 Kushoto ni Mwenyekiti Mwenza wa UKAWA, James Mbatia

“HAKUNA hali yoyote ya hofu,” anasema Mwenyekiti wa Chama cha Demokrasia na Maendeleo (Chadema), Freeman Mbowe akiwa amepata wasaa wa kukutana na waandishi wa habari asubuhi leo, ndani ya Hospitali ya Taifa ya Muhimbili, Dar es Salaam. Anaandika Pendo Omary … (endelea).

       Mbowe, mwenyekiti mwenza wa Umoja wa Katiba ya Wananchi (UKAWA) na mgombea ubunge jimbo la Hai, mkoani Kilimanjaro, amesema, “Ndugu wananchi nipo salama. Watanzania wasiwe na hofu. Kwa sasa namalizia muda uliobaki wa saa 24 kati ya saa 48 niliopewa na madaktari kwa ajili ya mapumziko.”

        Ametoa kauli hiyo kwa waandishi wa habari leo saa 5.17 asubuhi hospitali ya Taifa Muhimbili, katika ukumbi wa mikutano wa jengo la Kitengo cha Moyo, kwenye hospitali hiyo ambako amelazwa tangu kiasi cha saa 11 jioni jana, katika wodi Na. 2, Chumba Na. FF – 6 eneo la wagonjwa wa hadhi kubwa.

         Mbowe amelazwa kutokana na tatizo la uchovu wa mwili lililotokana na kufanya kazi ngumu mfululizo, na kwa muda mrefu bila ya kutumia muda wa kutosha kupumzika. Amekuwa akiendelea na uangalizi wa madaktari wa kitengo cha moyo.

         Daktari Tulizo Sanga akizungumza na waandishi wa habari, amesema walimpokea Mbowe saa 11 jana baada ya kupata rufaa kutoka Hospitali ya Doctors Plaza ya wilayani Kinondoni.

         Hali ya Mbowe ilibadilika ghafla jana akiwa kwenye gari eneo la Manyanya, na kulazimika kukatisha safari ya kwenda viwanja vya Biafra kusalimia wananchi waliokusanyika kumsubiri mgombea urais wa Chadema-Ukawa, Edward Lowassa aliyekuwa anatoka makao makuu ya Tume ya Taifa ya Uchaguzi (NEC) kuchukua fomu ya uteuzi. Ni hapo Mbowe alikimbizwa hospitali ya Doctors Plaza.

          Taarifa zilizochapishwa na gazeti la Mwananchi leo, zilisema Mbowe alijisikia afya yake kubadilika ghafla wakati msafara wa mgombea ukiwa unaenda Biafra, ukiwa umeahirishwa kwenda moja kwa moja makao makuu ya chama, mtaa wa Ufipa kwa kuwa kulikuwa na umma wa wananchi Biafra, baada ya kuelekezwa kubaki huko kutokana na ufinyu wa nafasi Ufipa.

          “Baadae aliletwa kitengo cha moyo; baada ya vipimo tuligundua kuwa anasumbuliwa na uchovu uliotokana na kufanya kazi kwa muda mrefu bila kupumzika,” amesema Daktari Sanga ambaye amekuwa akiongoza jopo la madaktari wanne wanaomhudumia Mbowe.

       Akiambatana na baadhi ya viongozi wakuu wa Ukawa na Chadema, Mbowe alifika kwa waandishi wa habari kwa kutembea bila shida, na baada ya kuketi ukumbi wa mikutano wa jengo hilo la Kitengo cha Moyo , alisema:                       “Nimekuja kuzungumza ili kuwahakikishia Watanzania wote kwamba nipo salama. Hakuna hali yoyote ya hofu kama ilivyojengeka kwenye mitandao ya kijamii.”

         Alisema afya yake ni nzuri na kwamba, “Namalizia tu saa nilizopewa na madaktari kwa ajili ya mapumziko.” Pembeni yake alikuwepo Mwenyekiti wa NCCR-Mageuzi, James Mbatia ambaye pia ni Mwenyekiti Mwenza wa Ukawa pamoja na Mbunge wa Arusha Mjini, Godbless Lema na madaktari Maneno Mlawa, Bashiri Nyangasa na Salome Kasanga.

           Mbatia alisema wanashukuru Mola kwamba hali ya Mbowe ni salama. “Tunamuombea aendelee hivyo,” alisema Mbatia, akisisitiza kuwa shughuli za Ukawa hazijaathirika kwa kuwa viongozi wengine wapo imara.

         “Ukawa sio mtu mmoja, ni Watanzania wote kwa hivyo ratiba itaendelea kama ilivyopangwa na yeye ataungana nasi baada ya kutoka hospitalini,” amesema.

Kwa wiki kadhaa sasa, Mbowe ambaye kwa nafasi yake ndiye muongoza vikao vyote vya juu vya Chadema, amekuwa katika shughuli nzito mfululizo za ndani ya chama, huku akilazimika kushiriki vikao vya mashauriano na wenyeviti wenzake katika UKAWA ili kukamilisha taratibu za kupata mgombea mmoja wa urais.

           UKAWA wenye pia vyama vya CUF na NLD cha Dk. Emmanuel Makaidi, wamefanikiwa kumteua Lowassa, na mgombea mwenza wake Juma Duni Haji kutoka Zanzibar, ambao wanatarajiwa kuanza safari ya kutafuta wadhamini kabla ya kurudisha fomu Tume Agosti 21. Katika safari hiyo watahutubia mikutano ya hadhara jijini Arusha, Mbeya, Mwanza, Zanzibar na mwishowe Dar es Salaam.

  Habari hii kwahisani ya Mwanahalis oline