WALIOTOA KINDUGU AJIRA ZA UHAMIAJI WALINDWA,NI WALIOWAPA WATOTO WAO,SOMA HAPA KUJUA

PICHANI NI VIJANA WASOMI MBALIMBALI WALIOJITOKEZA KWENYE USAHILI WA AJIRA ZA UHAMIAJI MWAKA JANA ZILIZOFANYIKA KWENYE UWANJA WA TAIFA AMBAPOA AJIRA HIZO ZILIZUA UTATA PICHA NA MAKTABA

Serikali imeshindwa kuwachukulia hatua watumishi wa Idara ya Uhamiaji nchini waliohusika na ajira 200 za upendeleo kwa nafasi ya Konstebo na Koplo, licha ya kamati ya uchunguzi iliyoundwa na Katibu Mkuu Wizara ya Mambo ya Ndani, kubaini kashfa hiyo.

         Katika uchunguzi wake, kamati hiyo ilibaini kuwa walioitwa katika ajira hizo walikuwa ni ndugu na jamaa za maafisa wa idara hiyo.

         Hata hivyo, akizungumza na Chanzo chetu jijini Dar es Salaam jana, Msemaji wa wizara hiyo, Isaac Nantanga, alisema kuwa watumishi hao wameshindwa kuchukuliwa hatua kwa kuwa hakuna ushahidi wa wazi uliopatikana kuthibitisha tuhuma za upendeleo zilizoelekezwa kwao.

         Alisema ndugu na jamaa za maafisa hao walikuwa na sifa za kuajiriwa ndani ya idara hiyo na hivyo, kukosekana kigezo cha kuwachukulia hatua.

      Hata hivyo, alisema Wizara ilitoa onyo dhidi ya waliohusika na mchakato huo kutokana na kutoa mwanya wa kuzuka malalamiko kutoka kwa wananchi kuhusiana na ajira hizo.

        “Waliitwa kazini, walistahili kuajiriwa, kwani walikuwa na sifa. Pia walistahili kuomba mara ya pili, maombi hayakubagua, bali zilizingatiwa sifa tu,” alisema Nantanga.

          Hata hivyo, alisisitiza kuwa malalamiko ya kuajiriwa ndugu na jamaa za maafisa hao hayakuwa na msingi wowote na kwamba, onyo la wizara limelenga kuwatahadharisha waliohusika na mchakato huo ili tukio kama hilo lisijirudie tena ndani ya idara hiyo.

        Alisema watumishi wa umma nao pia wanalindwa na sheria ya ajira, hivyo, hawawezi kufukuzwa kazi kwa kutuhumiwa tu, lazima uthibisho uwasilishwe na mamlaka husika zijiridhishe.  

      Agosti 22, mwaka jana, Katibu Mkuu wa Wizara hiyo, Mbarak Abdulwakil, alizungumza na waandishi wa habari jijini Dar es Salaam na kusema baada ya waombaji wa nafasi hizo kufanyiwa usaili na kuitwa kazini, ziliibuka tuhuma mbalimbali zilizotolewa na baadhi ya vyombo vya habari na mitandao ya kijamii. 

Tuhuma hizo zilihusu upendeleo wa ajira kwa ndugu na jamaa za watumishi wa idara hiyo, hivyo wizara ililazimika kuzisitisha na kuunda kamati ndogo ya watu watano ili kufanya uchunguzi wa kina kuhusu madai hayo.

Kamati hiyo ilipewa siku 10, kuanzia Agosti mosi, mwaka jana kukamilisha kazi hiyo, ambayo waliifanya kwa muda waliopewa na kutoa matokeo.

“Katika uchunguzi wao, kamati imebaini kuwa baadhi ya wasailiwa waliolalamikiwa wamethibitika kuwa ni watoto wa ndugu au jamaa wa watumishi wa idara hii.

“Baadhi ya waombaji wa nafasi hizi, walikuwa na umri mkubwa zaidi ya ule uliotajwa kwenye matangazo ya kazi (Konstebo miaka 25 na Koplo miaka 30), lakini walisailiwa na kuitwa kazini,” alisema Abdulwakil.

Alisema baadhi ya wasailiwa waliopata alama za juu katika ufaulu hawakuitwa kazini na hakuna sababu maalumu, ambazo zimetolewa, matangazo ya kazi yaliyotolewa kwenye vyombo vya habari, yalikuwa ya jumla na hayakuainisha viwango na madaraja ya ufaulu kwa waliomaliza kidato cha nne na sita.

Abdulwakil alisema kutokana na matokeo ya uchunguzi huo, ajira hizo zimefutwa na zitatangazwa upya.

Awali, ajira hizo zilitangazwa na Kamishna wa Uhamiaji katika Gazeti la Serikali, Februari 17, mwaka jana na kutoa tangazo hilo kwenye tovuti ya wizara na idara ya Uhamiaji.

Baada ya kutangazwa ajira hizo, maombi 15,707 yalipokelewa na waombaji 1,005 waliitwa katika usaili. Kati yao, 200 walishinda na kuitwa kazini, lakini baada ya kutoa tangazo la kuitwa kazini, malalamiko yalitolewa kupitia vyombo vya habari na mitandao ya kijamii kuwa walioitwa katika ajira hizi ni watoto wa jamaa na ndugu

CHANZO GAZETI LA NIPASHE