WIZI WA BILIONI MOJA STANBIC--JESHI LA POLISI LAFAFANUA HAYA..

JAMHURI YA MUUNGANO WA TANZANIA

WIZARA YA MAMBO YA NDANI YA NCHI

JESHI LA POLISI TANZANIA

PRESS RELEASE

24/10/2014

TAARIFA KWA VYOMBO VYA HABARI

POLISI KANDA MAALUM KUSHIRIKIANA NA VIONGOZI WA BENKI ILI KUBAINI NJAMA ZA WIZI

    Kamishna wa Polisi Kanda Maalum ya Dar es Salaam ameyasema hayo wakati alipokuwa mgeni rasmi katika hafla ya kukagua kikundi cha Polisi Jamii na Ulinzi Shirikishi kilichoundwa na Polisi wakishirikiana na wananchi wa kata ya Keko Magurumbasi.  Jeshi la Polisi linatoa wito kwa Benki zote na taasisi za kifedha kabla ya kuajiri wafanyakazi ni vizuri wafanyiwe upekuzi yakinifu (Vetting) ikiwa ni pamoja na kushirikiana na Jeshi la Polisi kwa kuwachukua alama za vidole(Finger Print) na kuchunguza katika maabara ya Jeshi hilo(Forensic Bureau) kama wafanyakazi au walinzi wamewahi kujiingiza katika makosa ya jinai kabla.  Aidha hivi karibuni umezuka mtindo wa baadhi ya  wafanyakazi wachache  wa benki kushiriki katika matukio ya wizi ndani ya Benki, ikiwa pamoja na  kupanga mikakati ya kufanikisha  wizi huo kwa kushirikiana na wahalifu

 Mnamo  majira ya saa nne na nusu Tarehe 23/10/2014 asubuhi,  Stanbic Benki Tawi la Mayfair Plaza Mikocheni, majambazi wapatao 10 mmoja akiwa na bastola walivamia na kuwaweka chini ya ulinzi wafanyakazi na kufanikiwa kuiba mamilioni ya pesa, aidha katika uchunguzi wa awali imebainika ni mpango wa ndani ya benki( Inside Job) ambao ulipangwa ili kukamilisha wizi huo. Jeshi la  Polisi linafanya msako mkali ili kuwabaini wahusika hao ili sheria ichukue. Tanzania ni nchi ya amani hivyo  haitakiwi kuharibiwa sifa zake  wawekezaji au wananchi. Aidha kuanzia sasa Benki zote zitalindwa kwa ushirikiano na kampuni za ulinzi zenye vifaa vya kisasa ikiwa pamoja na silaha za moto.

JESHI LA POLISI LAKANUSHA VIKALI KUHUSU UVUMI WA KUTEKA WATOTO JIJINI DAR ES SALAAM.

          Kamishna wa Polisi Kanda Maalum ya Dar es Salaam ameyasema hayo wakati alipokuwa mgeni rasmi katika hafla ya kukagua kikundi cha Polisi jamii na ulinzi shirikishi kilichoundwa na Polisi wakishirikiana na wananchi wa kata ya keko magurumbasi  kamishna kova alikanusha vikali juu ya uvumi unaoendelea jijini Dar es Salaam kuhusu utekaji nyara wa watoto wadogo wanaosoma shule. Hivi karibuni umezuka uvumi kutoka kwa watu mbalimbali hasa wazazi ambao uvumi huu umewafikia kwamba kuna kundi la wahalifu wanaotumia gari aina ya NOAH rangi nyeusi ambao kazi yao ni kuteka nyara wanafunzi kwa nia ya kutenda uhalifu ikiwa ni pamoja na kuwachuna ngozi na madhara mengine.

Mpaka sasa Jeshi la Polisi halina taarifa yoyote ya mtoto kutekwa au kufanyiwa madhara yoyote kwa mtindo wa utekaji nyara. Pia Jeshi la Polisi limegundua kwamba huu ni uvumi ambao haujulikani chanzo chake hivyo wananchi wanaombwa kuachana na uvumi huo na kuupuuza kwani unaleta hofu katika jamii bila sababu za msingi.

Aidha,  Jeshi la Polisi linapenda kuwatoa hofu wananchi na pindi wakiona mtu yeyote anayeeneza habari hizo watoe taarifa kituo chochote cha Polisi

S. H. KOVA

KAMISHNA WA POLISI KANDA MAALUM

DAR ES SALAAM