TAIFA LAGAWANYIKA RASMI,KATIBA YA SITTA YAWAPASUA VIONGOZI WA DINI,,UMOJA WAO HUKO SHAKANI SOMA HAPA KUJUA

SIKU moja baada ya marais wawili wa Tanzania kukabidhiwa Katiba inayopendekezwa, viongozi wa dini za Kikristo na Kiislam wamehitimisha kikao chao wakiwa na siri nzito kuhusu mustakabali wa taifa.

          Baadhi ya viongozi wa dini waliozungumza na Chanzo chetu, wamesema kuwa, “katiba imependekezwa, lakini nchi imepasuka,” na kwamba, hata viongozi wa madhehebu hayo makuu wamegawanyika vipande vipande.

           “Viongozi wa dini tunaelewana, lakini ukichunguza kwa undani utagundua kwamba tunatiliana shaka. Katiba hii imetugawa. Kuna mtazamo miongoni mwetu kwamba Waislamu wa Bakwata ni wa CCM, na maaskofu ni wa Ukawa,” alisema kiongozi mmoja wa Kiislamu kwa sharti la kutotajwa jina.

           Viongozi hao walikutana kwa siku tatu jijini Dar es Salaam katika mpango wa uhusiano bora kati ya Waislamu na Wakristo. Washiriki walikuwa Baraza Kuu la Waislamu (Bakwata), Baraza la Maaskofu Katoliki Tanzania (TEC), Jumuiya ya Kikristo Tanzania (CCT), Jumuiya ya Makanisa ya Kipentekoste Tanzania (CPCT) na baadhi ya mabalozi wanaowakilisha nchi zao hapa nchini.

             Shura ya Maimamu hawakualikwa katika mkutano huo, huku kukiwa na hisia miongoni mwa Shura ya Maimamu na Wakristo kwamba, Bakwata inafanya kazi kama idara ya Serikali.

           Kwa mujibu wa vyanzo vyetu kutoka kwenye mkutano huo, licha ya uhusiano mwema uliokuwapo, yalizuka maneno ya chini chini kati ya baadhi ya maaskofu na masheikh, hasa lilipoguswa suala la katiba.

           Moja ya matukio yaliyokuwa na mvuto ni lile lililohusisha Sheikh mmoja wa Temeke, Dar es Salaam (jina tunalo), na Askofu mmoja kutoka Kanda ya Ziwa (jina tunalo).

             Sakata lao lilianza pale Sheikh huyo alipowatuhumu maaskofu kwamba wanatoa matamko yanayokaa ki-Ukawa (Umoja wa Katiba ya Wananchi), kuhusu Bunge Maalumu la Katiba; na kwamba inawezekana maaskofu wanafanya hivyo kwa kuwa viongozi wa Ukawa, Freeman Mbowe na James Mbatia ni Wakristo.

        Ndipo Askofu huyo naye akahoji, “Kwa hiyo unataka kusema Ukawa ni ya Waktristo? Hivi nyie Waislamu mnaunga mkono hoja za CCM kwa kuwa ni ya Waislamu? Na kama unasema Ukawa ni ya Wakristo, unasahau kwamba mwenyekiti mwenza wa Ukawa mmojawapo ni Profesa Ibrahim Lipumba? Lini tumembatiza akawa Mkristo? Na hao wabunge wa CUF wote walio Waislamu, wamebatizwa lini?”.

          Taarifa zinasema kuwa, baada ya maswali makali hayo ya Askofu, ilimlazimu Sheikh huyo kutoka nje kwa muda, huku Sheikh mwingine akimsihi Askofu huyo amsamehe mwenzake, kwa maelezo kuwa ameteleza kauli.

              Hata hivyo, jana wakati akisoma tamko la pamoja la viongozi hao mbele ya waandishi wa habari katika Hoteli ya Whitesands, Askofu Mkuu wa Jimbo Kuu Katoliki la Mwanza, Yuda Thadeus Ruwaichi hakugusia mvutano huo, na hakuwa tayari kuulizwa swali lolote.

           Walioambatana na Askofu Ruwaichi kwenye tamko na kukataa kujibu maswali walikuwa ni Katibu Mkuu wa Baraza la Maaskofu Katoliki, Padre Raymond Saba, Sheikh Hassan Kabeke wa Bakwata, Katibu wa Mufti wa Zanzibar, Sheikh Fadhil Soraga na kwa niaba ya CCT alikuwepo Mchungaji Leonard Mtaita.

            Katika tamko lao, viongozi wa dini wamesema kuwa wataendelea kuongoza na kusimamia jamii zao katika kujenga na kusimamia maadili mema, kuongoza jamii kuwa mfano bora na kuchukua dhamana ya kuhamasisha na kusimamia utu, uhai na ustawi kwa wote.

            Vile vile, wamesema wataendelea kutetea dhana ya serikali kutokuwa na dini, bali raia wa nchi hii ndio wawe na dini, hivyo kusaidia kutumia vyema uhuru wa kuabudu kwa kuzingatia sheria za nchi kwa lengo la kulinda umoja, amani na mshikamano wa kitaifa.

          Wameshauri na kuihimiza serikali iendeleze misingi ya utawala bora, na ihakikishe kuwa rasilimali za taifa letu zinatumika katika kuwanufaisha na kuwaunganisha wananchi.

              Wamekemea serikali kwa kutumia mabavu na silaha kugombanisha na kugawa wananchi; kwamba si busara kutumia mabavu kama njia ya kutatua migogoro katika jamii.

             Wakati huo huo, maaskofu wanaounda Jukwaa la Makanisa, wamesisitiza kwamba tamko walilotoa dhidi ya mchakato wa Katiba Mpya na mwenendo wa Bunge la Maalumu la Katiba ni wa kinabii na uzito wake uko pale pale, licha ya kubezwa na aliyekuwa Mwenyekiti wa Bunge hilo, Samuel Sitta.

          Maaskofu hao, wameazimia kuusambaza tena jinsi ulivyo na kutia saini zao kama kielelezo cha kauli yao ya pamoja dhidi ya wale wanaoupinga.

          Walisema lile ni tamko lao la pamoja na wapo tayari kuingia katika historia ya kuwataka waumini wao kukataa katiba iliyopendekezwa, kwa kuwa haiwakilishi maoni ya wananchi bali ya watawala

Chanzo ni Gazeti Makini la Tanzania Daima