Miaka 50 ya hospitali ya Bugando

 

Na. Paschal Dotto-MAELEZO

Rais wa Jamhuri ya Muungano wa Tanzania, Mhe. Samia Suluhu Hassan, amesema Serikali itaendelea kushirikiana na taasisi za afya ili kuimarisha utoaji wa huduma kwa wananchi katika maeneo mbalimbali nchini.

Akizungumza katika sherehe za kuadhimisha miaka 50 ya kuanzishwa kwa Hospitali ya Bugando zilizofanyika katika hospitali hiyo Jijini Mwanza, Rais Samia Suluhu Hassan amesema kuwa Serikali inaendelea kutoa ushirikiano kupitia mambo mbalimbali ikiwemo utoaji fedha kwa ajili ya maendeleo ya hospitali hiyo, lakini pia kulipa watumishi jambo ambalo limetekelezwa kwa muda mrefu baada ya Serikali na hospitali hiyo kuingia makubaliano.

“Miaka 50 ya Bugando, Serikali imetoa ushirikiano mkubwa katika kuendeleza na kuimarisha huduma za kibingwa ambazo kwa sasa zinatolewa na kuwa msaada mkubwa kwa wananchi wa Kanda ya Ziwa katika mikao minane yenye wananchi milioni 18, ndiyo maana shilingi bilioni 4.2 za IMF zimeelekezwa hospitali ya Bugando kwa ajili ya kufanya maendeleo kwenye huduma mbalimbali”, alisema Rais Samia.

Alisema kuwa Serikali kwa kushirikiana na Kanisa imeweza kuboresha hospitali hiyo, ambapo hapo awali ilikuwa na vitanda 550 na sasa idadi ya vitanda imeongezeka mpaka 950, ambavyo vitaweza kutoa huduma kwa wananchi katika maeneo ya Kanda ya Ziwa, hiyo inaonyesha mwendelezo wa kutekeleza makubaliano yaliyoingiwa kati ya Serikali na kanisa yanayoifanya Serikali kulipa mishahara ya watumishi, ambapo wastani wa shilingi bilioni 20 hutolewa kila mwaka kwa watumishi 1200 walioajiriwa na Serikali.

Rais Samia aliongeza kuwa katika kuhakikisha dawa zinapatikana katika hospitali hiyo,  Serikali imeendelea kutoa ruzuku ya dawa kwa  wastani wa shilingi bilioni moja kila mwaka na kufanya upatikanaji wa dawa kuwa mkubwa katika hospitali hiyo ambayo kwa sasa inahudumia kama Hospitali ya Kanda ya Ziwa kwa ushirikiano wa Kanisa na Serikali na kuwezesha kutanua huduma tofauti na hapo awali.

“Miaka 50 ya Bugando  tumetanua wigo wa huduma zinazotolewa ukilinganisha na huduma zilizokuwa zinatolewa hapo awali na hivyo kupelekea Serikali kuipa hospitali hii hadhi ya kuwa hospitali ya Rufaa ya  Kanda ya Ziwa”, Alisema Rais Samia.

Aidha, Rais Samia alisema kuwa katika miaka 50 ya Bugando Serikali ikishirikiana na Kanisa imeendelea kujikita katika kuhakikisha inasogeza huduma za kibingwa na huduma bobezi karibu zaidi na wananchi hasa Kanda ya Ziwa ambapo kwa sasa Hospitali hiyo inahudumu kwa wananchi wa mikao minane yaani Mwanza, Kagera, Kigoma, Geita, Shinyanga, Mara, Kagera na Tabora.

 

Aliongeza kuwa katika kutekeleza majukumu ya kuimarisha afya kwa wananchi Serikali imeendelea kuchangia ujenzi wa wodi za wagonjwa wa saratani ambapo tayari imetoa shilingi bilioni moja kwa bajeti ya mwaka 2021 na alitoa wito kwa wataalam wa afya kujikita zaidi katika tafiti zinazobaini sababu na chanzo cha saratani kwa wanawake hasa Kanda ya Ziwa.

“Miaka 50 ya Bugando ninatoa wito kwa watalaam wa afya kupunguza kasi ya maradhi yasiyoambukiza ikiwemo kansa, fanyani tafiti na kujikita zaidi katika kwenye saratani hasa kwa maeneo ya kanda ya ziwa kwani wanawake wamekuwa wakiathirika sana na kansa ya kizazi na matiti”, Alisisitiza Rais Samia

Rais Samia alisema serikali iliahidi kugharamia ujenzi wa vyumba vya kuhifadhia mashine za kutolea tiba ya mionzi 6 zilizogharimu shilingi bilioni 5.5 kwa ajili ya kufungua mitambo ya tiba ya saratani, lakini pia itahakikisha kuwa  ujenzi wa wodi ya wagonjwa wa saratani unakamilika kwa wakati ili huduma ziweze kupatikana kwa Wananchi haraka na kwa wakati.

Akizungumzi maadhimisho ya miaka 60 ya Uhuru wa Tanzania, Rais Samia amewahimiza wananchi kuendelea kufanya kazi kwa bidii ili kujenga nchi yao kama ilivyokuwa kwa Serikali zote tano tokea awamu ya kwanza zimekuwa zikihimiza kufanya kazi, amesema miaka 60 ya uhuru watanzania waendelee kuchapa kazi katika maeneo yao ili kujenga uchumi wa nchi.

Kwa upande wa huduma za kijamii hususani upatikanaji wa  maji na umeme, Rais Samia amewataka watanzania kuacha kuvamia maeneo yenye vyanzo vya maji ili kuwezesha uzalishwaji wa maji kuwa mkubwa na kuwezesha upatikanaji wa maji katika maeneo mbalimbali hasa yale ya mjini akitolea mfano Dar es Salaam kubwa mkubwa na kufanya mgao wa huduma hiyo kupungua kwa kiasi kikubwa.

Kwa upande wake Waziri wa Afya, Maendeleo ya Jamii, Jinsia Wazee na Watoto, Dkt. Dorothy Gwajima amesema kuwa Bugando imekuwa mshirika mzuri katika kutoa huduma za afya kwa kushirikiana na Serikali na miaka 50 ya maadhimisho haya ni miaka ya uhakika wa utoaji huduma za kibingwa kwa wananchi wa kanda ya ziwa.

“Hospitali hii imekuwa ikishirikiana na Serikali miaka mingi na imepiga hatua kubwa kufikia hapo tulipo sasa, tayari wewe Mhe. Rais unaendeleza ushirikiano huo ambapo Serikali yako imetoa fedha za kitanzania Shilingi Bilioni 4.2 zimeelekezwa hapa kwa ajili ya maendeleo katika mambo ya Oksijeni, jengo wa wagonjwa wa dharula pamona na MRI na leo umezindua mashine mpya ambayo itasaidia kutoa matibabu ya kibingwa na kupunguza gharama kwa wananchi”, alisem  Dkt. Gwajima.

Naye Askofu Mkuu wa Jimbo Kuu, Mwanza Leonard Nkwande alisema kuwa Hospitali ya Bugando ikishirikiana na Serikali inaendelea kutoa huduma za Kibingwa na Bobezi kwa wananchi wa maeneo mbalimbali hususani kwa maeneo ya kanda ya Ziwa.

“ Katika Miaka 50 ya Bugando, tunaona hospitali hii inavyoendelea kutoa huduma za za kibingwa kuhakikisha wananchi wanapata Afya bora ili waweze kujenga taifa, tunaishukuru Serikali kwa kuendelea kutoa ushirikiano katika kuhakikisha tunafanya kazi iliyonzuri”, Askofu Mkuu Nkwande.