MUMBILI KWA VITAMBULISHO SASA

MENEJIMENTI ya Hospitali ya Taifa Muhimbili, Dar es Salaam, imetangazautaratibu mpya wa wagonjwa, wafanyakazi na watu mbalimbali kuingia hapo kwa shughuli zao ikiwa ni pamoja na kupata huduma ya tiba, kufanya kazi na pia kuchukua maiti na kuona wagonjwa.

Kwa mujibu wa utaratibu huo, ambao pamoja na mambo mengine umeweka mfumo mpya wa kuingia hospitalini hapo, wafiwa wanaokwenda kuchukua au kuaga miili ya ndugu zao, sasa watapaswa kuwa na vitambulisho na kumtambua marehemu kwa jina kabla ya kuruhusiwa.

Ili kurahisisha hilo, kwa mujibu wa utaratibu huo mpya ambao ulianza kutumika Jumatatu, majina ya marehemu watakaoagwa au kuchukuliwa katika siku husika, yatakuwa kwa walinzi langoni ili kurahisisha shughuli hiyo.

Watakaohitaji kuaga au kuchukua miili ya wapendwa wao, watatakiwa kutaja majina ya marehemu kwanza kwa walinzi wa lango kuu la kuingilia na kama yatakuwa kwenye orodha ya wanaotarajiwa kuchukuliwa siku hiyo, wataruhusiwa.

Mbali na utaratibu wa kuchukua na kuaga maiti, mfumo huo mpya umeweka utaratibu wa kuhudumia wagonjwa na kuingia kutibiwa au kuona daktari na pia kwa wanaopeleka chakula kwa wagonjwa, ataruhusiwa mtu mmoja tu atakayezingatia muda uliowekwa wa kuona wagonjwa.

Kupitia utaratibu huo, wagonjwa wanaokwenda kutibiwa, watalazimika kuonesha kadi zao za miadi kwa walinzi kabla ya kuingia, zikionesha tarehe husika ya kliniki au barua ya rufaa inayoonesha kuwa wanatakiwa kutibiwa hospitalini hapo.

 

Kwa wafanyakazi na wanafunzi wa hospitali hiyo, watapaswa kuvaa

vitambulisho wakati wote wawapo hapo na sare zao za kazi hadi muda wa

kazi utakapokwisha ambapo pia magari yatakayoingia hapo, yatafanyiwa

ukaguzi maalumu na ya wafanyakazi yatabandikwa stika maalumu kwa ajili

ya utambulisho.

Katika ukaguzi huo, dereva na abiria wataeleza wanakokwenda na baada ya hapo, watafuatiliwa ili kuhakikisha walikosema ndiko kweli waendako; lengo la yote hayo ni kukabiliana na vitendo vya uhalifu vinavyojitokeza  hospitalini hapo.

Tunapongeza hatua hiyo ya Muhimbili, kwani vitendo vya wizi na

udanganyifu vimekuwa vikifanyika hapo kutokana na hospitali hiyo kubwa nchini, kupokea watu wengi na magari mengi kwa wakati mmoja huku wakijipenyeza wengine na kujifanya madaktari na kuibia wagonjwa fedha.

Tunashauri utaratibu huu usimamiwe vizuri ili usitumike vibaya na

watumishi wachache wasio waadilifu, kunyanyasa wananchi na hususan wagonjwa wanaofika hapo kupata huduma za kiafya na zingine zenye maslahi kwao.

Ni kawaida sehemu yoyote panapoanzishwa utaratibu unaobana watu, wapo wachache ambao hutafuta kila mbinu kuhakikisha taratibu hizo zinahujumiwa na hatimaye kuondolewa na hilo mara nyingi husababisha watu kukamuliwa hata fedha ili tu ukiukwaji uweze kuhalalishwa.

Mathalan kuna watu wengine watataka kuingia kuona wagonjwa wao kwa kundi na watakapokataliwa watatafuta uwezekano wa kuhonga ili waruhusiwe kuingia na inapofanikiwa huku walinzi wakinufaika kifedha, basi ‘uhalalishwa’ na kuwa utaratibu wa kawaida ‘kulipia’ kuingia Muhimbili.

Sisi tunaamini kama utaratibu uliowekwa na Muhimbili utaheshimiwa na kufuatwa kama inavyotakiwa, malalamiko ya wizi wa vyombo vya usafiri na

udanganyifu ambao umekuwa ukifanywa na vitendo vya madaktari feki kuvinjari vitamalizika.

Ni vema wananchi wanaopata huduma Muhimbili wakatoa ushirikiano katika

kuheshimu na kufuata taratibu hizi, lakini pia walinzi watumie busara, utu, uaminifu na uadilifu katika kutekeleza majukumu yao ya kuhudumia Watanzania wenzao lakini pia wageni walioko nchini.