RAIS CHUO CHA USAFIRISHAJI AMPONGEZA MAGUFURI

Rais wa serikali ya wanafunzi chuo cha Taifa cha usafirishaji (SONIT) Bw. Stambuli Mombeki Kaiza (PICHA MAKTABA)

Rais wa serikali ya wanafunzi wa chuo cha Taifa cha usafirishaji (NIT) Stambuli Mombeki amesifu uzinduzi wa  mradi wa ujenzi, ukarabati na upanuzi wa bandari ya Dar es Salaam uliofanywa na Rais wa Jamuhuri ya Muungano wa Tanzania akisema kuwa mradi huo utasaidia watanzania wengi kuinuka kimaendeleo ikiwamo wahitimu wa sekta ya usafirishaji kupata ajira

“Serikali ya wanafunzi ya chuo cha Taifa cha usafirishaji SONIT tunapongeza jitihada za Rais wa Jamuhuri ya Muungano wa Tanzania John Magufuli kwa jitihada zake anazofanya, lakini Zaidi ni kuhusu upanuzi wa bandari ya Dare salaam kwani tunaamini ajira nyngi za moja kwa moja na ambazo si za moja kwa moja zitapatikana” Alisema Mombeki

Akizungumza na Mtandao wa FULLHABARI BLOG Rais wa Serikali ya Wanafunzi wa  chuo hicho Bw. Stambuli Mombeki amesema wao kama wanafunzi wa sekta ya usafirishaji wameguswa na jitihada zinazofanywa na Rais katika kuimarisha miundombinu ya usafirishaji Nchini na kwamba wao kama nguvu kazi iliyobobea katika utaalamu wa usafirishaji wanaamini wana kila sababu ya kupaza sauti zao za kuunga mkono jitihada hizo.

 Hivi karibuni Rais wa Jamuhuri ya Muungano wa Tanzania John Maguli aliweka jiwe la msingi la uzinduzi wa  ujenzi, ukarabati na upanuzi wa bandari ya Daresalaam.

Hafla hiyo ilfanyika mwanzoni mwa mwezi wa huu katika eneo la bandari Jijini Dar es Salaam na kuhudhuriwa na viongozi mbalimbali wakiwemo Waziri wa Ujenzi, Uchukuzi na Mawasiliano Prof. Makame Mbarawa Mnyaa, Waziri wa Viwanda, Biashara na Uwekezaji Charles Mwijage, Balozi wa Uingereza hapa nchini Sarah Cooke na Mwakilishi wa Benki ya Dunia Bi. Bella Bird.

Rais Magufuli alibainisha kuwa Serikali ya Awamu ya Tano imedhamiria kuboresha bandari zote nchini lakini ameitaka TPA na Mamlaka ya Mapato Tanzania (TRA) kuongeza udhibiti wa mizigo inayoingia na kutoka kupitia bandari kwa kuhakikisha mizigo hiyo inakuwa halali na inalipiwa kodi ipasavyo.

Ujenzi, ukarabati na upanuzi wa bandari ya Dar es Salaam umepangwa kufanyika kwa miezi 30 kuanzia sasa kwa gharama ya Shilingi Bilioni 926.2 ambapo kati yake, Shilingi Bilioni 132 zinatolewa na Serikali ya Tanzania, Shilingi Bilioni 770 ni mkopo wa masharti nafuu kutoka Benki ya Dunia na Shilingi Bilioni 24 ni Msaada kutoka Shirika la Maendeleo la Uingereza (DFID).

Kazi za ujenzi, upanuzi na ukarabati huo zitafanyika katika gati namba 1 hadi gati namba 7 ambazo zinaendeshwa na Mamlaka ya Usimamizi wa Bandari Tanzania (TPA) na zitahusisha kujenga gati hizo, kuongeza kina cha bahari kwa kuongeza urefu kutoka wastani wa mita 12 hadi kufikia mita 15.5 na kukarabati miundombinu wezeshi ya bandari.

Mradi huu mkubwa utaiwezesha bandari ya Dar es Salaam kuongeza uwezo wa kuhudumia meli kubwa kutoka meli zenye urefu wa meta 243 na uwezo wa kubeba makontena kati ya 2,500 na 4,000 hadi kufikia meli zenye urefu wa meta 320 na uwezo wa kubeba makontena kati ya 6,000 na 8,000 na pia kuongeza uwezo wa kuhudumia shehena za mizigo kutoka tani Milioni 18 za sasa hadi kufikia tani Milioni 28 ifikapo mwaka 2022.

Akizungumza kabla ya kuweka jiwe la msingi la ujenzi huo, Rais Magufuli amewashukuru wadau wa maendeleo walioshiriki kufanikisha mradi huo ambao ni Benki ya Dunia na DFID na amesema mradi huu ukikamilika utaiwezesha bandari kuwa ya mfano, na ametaka wakandarasi wanaojenga mradi huo waukamilishe haraka ikiwezekana kabla ya miezi 30 kuisha ili Tanzania na nchi za Rwanda, Uganda, Burundi, Jamhuri ya Kidemokrasia ya Kongo (DRC), Zambia, Malawi na Zimbabwe zianze kunufaika mapema.