TANAPA YATOA MILIONI ISHIRINI KUSAIDIA UOKOAJI KARIAKOO

    Dkt.Jimmy Yonazi akizungumza mapema leo na Waandishi wa habari kariakoo Jijini Dar es salaam,

Mwenyekiti wa Bodi TANAPA Jenerali Mstaafu George Waitara( mwenye shati nyeupe) akikabidhi hundi ya shilingi milioni 20 kwa Katibu Mkuu Ofisi ya Waziri Mkuu Sera,Bunge na Uratibu Dkt Jimmy Yonazi

Na Mussa Augustine 

Shirika la hifadhi za Taifa Nchini (TANAPA) limetoa msaada wa shilingi milioni 20 katika kitengo cha maafa Ofisi ya Waziri Mkuu ,ikiwa ni mchango wa kuwezesha shughuli za uokoaji katika Jengo la ghorofa ambalo limeporomoka Novemba 16,2024 Kariakoo Jijini Dar es salaam.

Akizungumza leo Novemba 21, 2024 Katika eneo la tukio kariakoo Jijini Dar es salaam wakati wa kukabidhi hundi ya shilingi milioni 20, Mwenyekiti wa Bodi ya Wadhamini ya TANAPA, Jenerali mstaafu George Waitara amesema kuwa tukio hilo limesababisha maafa makubwa ikiwemo vifo,uharibifu wa mali pamoja na matatizo ya kisaikolojia kwa waathirika wa tukio hilo.

" TANAPA ni sehemu ya wananchi wa Tanzania,hivyo tumeguswa tukaona tutoe chochote kusaidia uokoaji wa maafa haya" amesema Jenerali Waitara.

Kwa upande wake Katibu Mkuu Ofisi ya Waziri Mkuu,Sera,Bunge na Uratubu  Dr.Jimmy Yonazi ameishukuru TANAPA kwa msaada huo,nakuwaomba Watanzania walioguswa na maafa hayo  waendelee kutoa michango yao ili kufanikisha zoezi la uokoaji kwa haraka.

Pia ametangaza "control Number " kwa ajili ya wananchi ambao watakaoguswa  kutuma michango yao kwa ajili ya kusaidia shughuli za uokoaji.

" Control number ni 987320001709 ambapo namba hii inatumika kwa mitandao yote ,mwananchi anaweza kuchangia kuanzia 1000 nakuendelea na fedha hizi zinaingia moja kwa moja kwenye akaunti ya Maafa ambayo ni 9921159801" amesema Dkt.Yonazi.