Diwani Bagamoyo atembea kwa miguu kusikiliza kero za wananchi

 

Diwani wa Kata ya Nianjema iliyopo katika Halmashauri ya Wilaya ya Bagamoyo Mhe.Abdul Pyalla wa Kati kati aliyevaa kofia akizungumza na wananchi wakati wa ziara yake ya kikazi.

Mwandishi wetu

Diwani wa Kata ya Nianjema Mh. Abdul Pyalla amefanya ziara ya mtaa kwa mtaa lengo likiwa kusikililiza kero na changamoto zinazowakabili wananchi na kuzipatia ufumbuzi.

Akizungumza na baadhi ya wananchi katika mtaa wa Magomeni A pamoja mtaa wa Nianjema B, Mh. Abdul Pyalla alisema kwamba ameamua kuwatembelea wananchi ili kuweza kusikililiza kero zao mbali mbali na kuweza kuzitafutia ufumbuzi.

Pia alisema kuwa katika ziara hiyo amejipanga vilivyo kutokana na kuambatana na wataalamu mbali mbali kutoka taasisi za serikali pamoja na mashirika ya umma nia na madhumuni ni kupata majibu ya kina kutoka kwa wataalamu husika.

“Ziara yangu hii lengo lake kubwa ni kutembelea mitaa mbali mbali ambayo ipo katika kata yangu ya Nianjema na dhumuni lake kubwa ni kusililiza kero na changamoto mbali mbali zinazowakabili wananchi wangu katika sekta tofauti,”alisema Diwani huyo.

Aidha aliongeza kuwa lengo lake kubwa ni kuhakikisha kwamba anaweka mipango madhubuti kwa kushirikiana na viongozi wenzake pamoja na taasisi za kiserikali kwa kuwaletea huduma mbali mbali za kijamii ikiwemo upatikani wa umeme, maji, afya, elimu pamoja na mahitaji mengine.

“Nashukuru pia katika mkutano huu tumeshirikiana kwa ukaribu na taasisi tofauti Kama vile Tanesco, Dawasa, Tarura, TFS, pamoja na wenzetu wa benki ya NMB ambao wameweza kutoa fursa ya utoaji wa elimu mbali mbali na umuhimu wa kujiunga na bima kupitia benki hiyo,” alisema

Katika hatua nyingine aliahidi kuendelea kushirikiana bega kwa bega na taasisi zote za kiserikali pamoja na mashirika ya umma kwa lengo la kuweza kutatua changamoto za wananchi na kuweka mipango ya pamoja katika kuwaletea maendeleo yenye tija kwa wote.