ads header

Zinazobamba

BAVICHA WABADIRI GIA ANGANI,NI KUHUSU MKUTANO MKUU WA CCM,SOMA HAPO KUJUA

19:50:00

Viongozi wa Bavicha wakizungumza na waandishi wa habari hawapo pichani
Viongozi wa Bavicha wakizungumza na waandishi wa habari hawapo pichani


BAADA ya kutakiwa kuachana na mpango wa kuzuia mkutano mkuu wa Chama Cha Mapinduzi (CCM), Baraza la Vijana la Chadema (Bavicha) limeamua kubadili mbinu, anaandika Faki Sosi.
Kwa zaidi ya wiki tatu sasa, Bavicha na Jeshi la Polisi wamekuwa wakivutana baada ya kuwepo kwa zuio la mikutano ya siasa ya wazi na ndani lililotolewa na polisi pia Rais John Magufuli.
Leo Bavicha wameeleza kusitisha dhambira yao ya kuzuia mkutano huo kwa heshima maagizo ya Freeman Mbowe, Mwenyekiti wa chama hicho taifa aliyewataka kuachana na mpango huo.
Akizungumza katika Makao Makuu ya chama hicho jijini Dar es Salaam, Patrobas Katambi, Mwenyekiti wa Bavicha Taifa amesema kuwa, pamoja na kukubaliana na ombi hilo lakini bado wanaamini kuwa, mkutano wa CCM utakaofanyika tarehe 23 Julai mwaka huu ni haramu.

“Tutakuja na mpango mbadala utakaoratibiwa baada ya mkutano wa kamati tendaji ya chama utakaofanyika tarehe 20 Julai Mwaka huu. Tunasema ipo haja kwa serikali kutangaza kufuta vyama vya siasa na kibaki chama cha CCM kuliko kuvunja sheria na kuipendelea,” amesema Katambi na kuongeza kuwa “kwa sasa ni mapema kutaja mpango huo.”
Hata hivyo Bavicha wamelitupia lawama Jeshi la Polisi nchini kwamba, haliheshimu haki wala utawala wa sheria na linaweza kuiingiza nchi matatani wakati wowote.
Wakati Bavicha wakisema hivyo, jeshi hilo limeeleza kuwa, mtu ama chama chochote kitakachokwenda kinyume na maelezo yao, watapambana nacho/naye.
Kauli hizi zinatoka ikiwa ni baada ya Jeshi la Polisi kupiga marufuku mikutano ya hadhara ya kisiasa ya ndani na nje nchi nzima kauli ambayo ilitanguliwa na ile ya Rais John Magufuli kwamba, siasa zisifanyika mpaka kwenye uchaguzi mkuu wa mwaka 2020.
Patrobas Katambi, Mwenyekiti wa Bavicha Taifa akizungumza na waandishi wa habari hii leo Makao Makuu ya Chadema, jijini Dar es Salaam amedai kuwa, jeshi hilo limekuwa likilinda maslahi ya Chama Cha Mapinduzi (CCM) hata kama kinatenda mambo yaliyo kinyume na sheria na Bavicha haitavulia upendeleo huo.
“Polisi wa nchi hii wapo radhi wafe wao lakini CCM isiguswe na waendelee kuwa madarakani. Uko wapi usawa wa kidemokrasia? Uko wapi weledi wa utendaji wa jeshi letu la polisi,” amehoji Katambi.
Katambi amesema kuwa, zuio la mikutano ya hadhara ya kisiasa limelenga vyama vya upinzani tu ambapo CCM na viongozi wake wa ngazi mbalimbali wanafanya mikutano ya hadahara bila zuio lolote la polisi.
“Tunayo taarifa ya baadhi ya mawaziri na wabunge wa CCM kuwa wanafanya mikutano ya hadhara katika majimbo mbalimbali hapa nchini, na tunazo picha za matukio hayo kama ushahidi, polisi wanataka tuamini kuwa wanatumika?” amesema.