WABUNGE WA UKAWA DAR WACHACHAMAA,WAMGOMEA MKUU WA MKOA,SOMA HAPO KUJUA

Saed Kubenea, Mbunge wa jimbo la Ubungo (kushoto) na Halima Mdee, Mbunge wa Jimbo la Kawe

WABUNGE wa vyama vinavyounda Umoja wa Katiba ya Wananchi (Ukawa) jijini Dar es Salaam leo wamemgomea Meck Sadick, Mkuu wa Mkoa wa Dar es Salaam kushiriki Kikao cha Kamati ya Ushauri (RCC) Mkoa wa Dar es Salaam kwa madai ya kutotendewa haki, anaandika Happyness Lidwino.

Wabunge hao waliandikiwa barua na Theresia Mmbando, Katibu Tawala wa Mkoa wa Dar es Salaam kuwaarifu wabunge hao pamoja na wajumbe wengine wa kikao hicho kushiriki na baadaye kwenda kutembelea miradi ya maendeleo.

Mmbando ndiye liyekuwa Mwenyekiti wa mkutano wa kumchagua Meya wa Jiji la Dar es Salaam uliofanyika Jumamosi wiki iliyopita na baadaye kuhairishwa na kuibua malumbano ya kisiasa.

Taarifa zaidi zinaeleza kuwa, hatua hiyo imetokana na hasira za Ukawa kwa kile kinadaiwa kuwa ni kufanyiwa hujuma na Serikali ya Mkoa wa Dar es Salaam kwa kushirikiana na Chama Cha Mapinduzi (CCM) katika kuvuruga utaratibu wa kumpata Meya wa Jiji la Dar es Salaam.

Uchaguzi wa Meya wa Jiji la Dar es Salaam umeghairishwa mara nne mpaka sasa kutokana na kuibuka vuta nikuvute kati ya Ukawa na CCM huku ikitajwa kwamba, CCM wanaendesha hujuma ili kutwaa nafasi hiyo licha ya kuwa wachache.

Miongoni mwa wabunge waliogomea kikao hicho ni pamoja na Saed Kubenea, Mbunge wa Jimbo la Ubungo (Chadema); Abdallah Mtulea, Mbunge wa Jimbo la Temeke (CUF); Maulid Mtulia, Mbunge wa Jimbo la Kinondoni (CUF) na Waitara Mwita, Mbunge wa Ukonga (Chadema).

Wabunge hao wamesema kwamba, hawatoshiriki vikao vya RCC kutokana na kutokuwa na imani na uongozi wa mkoa. Kikao hicho kilipangwa kufanyika tarehe 3 Machi mwaka huu katika Ukumbi wa Kareem Jee, Dar es Salaam.